Kristine nagpabadlong ug nagrebelde?

Nisamot ka negatibo ang pagtan-aw sa mga himantayon sa showbiz ngadto kang Kristine Hermosa, human nga wala siya mutunga sa "36th Box Office Entertainment Awards" didto sa C.P Auditorium sa RCBC Plaza, niadtong Domingo sa gabii.

Pong pa sa mga balhiboon og baba nga hayan gipamatud-an lang ni Kristine nga dili gyud siya deserving sa titulo nga "Box Office Queen" hinungdan nga no-show ang iyang drama.

Kahinumduman nga sa exclusive report dinhi sa Banat Hugyaw niadto pang Pebrero, miisa ang kilay sa mga himantayon sa dihang giyagyag sa kolumnista sa PangMasa, Lolit Solis nga si Kristine ang "Box Office Queen," tungod sa kalampusan nga naangkon sa 'Enteng Kabisote."

Matud pa sa mga himantayon nga dili si Kristine kondili si Angel Locsin ang haom sa maong titulo sanglit puro maayo og kita ang duha niini ka pelikula- "Mulawin the movie" ug ang "I Will Always Love You."

Samtang atol sa awarding niadtong Domingo, gisaway usab ang palpak nga nahimo sa in-charge sa trophy tungod kay pareho nga nakakuha og award ang "Encantadia" ug ang direktor niini nga si direk Mark Reyes, apan usa ra ka trophy ang gidala sa trophy girl.

Ang resulta wala na mahatag sa stage ang lain pang trophy tungod kay wala pa gani mahuman si direk Mark sa iyahang speech, misulod man dayon ang mga taga Pinoy Big Brother aron dawaton usab ang ilang pasidungog.

Wala makatunga sila Mark Herras ug Jennylyn Mercado tungod kay gihilantan na usab human sila miabot gikan sa New York.

Zoren walay kabutangan sa kalipay

Super happy si Zoren Legaspi tungod kay natuman na gayud ang iyang pangandoy nga mahimong direktor pinaagi sa bag-ong show sa GMA-7, ang Fantastikids nga magsugod na karong May 6.

Silang duha ni Jun Lana ang direktor sa maong show diin bida sila si Marky Cielo, Jackie Rice, Isabella de Leon ug BJ "Tolit" Forbes.

Si Zoren nga nahinabi sa PangMasa mipadayag nga andam na siya sa mga pagsaway unya nga ibato ngadto sa ilang proyekto. Unang gipakita ni Zoren ang iyang katakus isip direktor sa usa ka episode sa "Huwag Kukurap," ug human niadto gihatag kaniya ang Fantastikids.

"Hindi ko naman inaasahan that they will give me a show right away," sey ni Zoren. "Gusto ko lang naman ay ipakita 'yung mga natutunan ko sa pagdidirek. Ngayon pinakamalaking break itong Fantastikids na binigay sa akin and I will do my best para maging maganda ang kalalabasan ng bawat episode."

Happy usab si Zoren sanglit mahimo na nga motan-aw sa iyang proyekto ang iyang kaluha nga mga anak nga sila si Maverick ug Cassandra sanglit pambata gayud ang tema sa Fantastikids, dili sama sa Mulawin ug Majika nga bug-at ra ang tema alang sa panabot sa ilang mga anak ni Carmina. - Ryan Mark