Ug mitak-op ang puting tabil sa SNG

Human sa mabungahon ug puno sa hudyaka nga napulo ka tuig, hingpit na nga tak-opan ang tabil nga naghatag og bulok sa mauswagon ug malambuon nga "noon time variety show" sa ABS-CBN Central Visayas, ang 'Sabado Na Gyud' kon SNG! Game show ang gikatakda nga ihulip unya niini nga ilusad sunod bulan. Busa angayan nga dili ninyo palabyon ang "farewell episode" sa SNG karong alas onse sa buntag, nga didto pa gipahigayon sa daw paraiso nga isla sa Boracay.

Ang 'Sabado Na Gyud' nga giilang Cebu's Party TV mi-ani na og tulo ka KBP awards sa natad sa kalingawan isip "best variety show." Nagsugod kini niadtong tuig 1996 sa bulan sa Agosto. Ug sulod sa napulo ka tuig, ang SNG nahimong dalan aron maila ang mga talento sa mga batan-on apan madasigon nga mga binuhat nga karon nakabaton na og kaugalingon ngalan dili lamang dinhi sa Sugbo kondili lakip na usab sa kaulohan.

Angay nga masayran sa tanan nga ang SNG maoy milusad sa mga bitoon sa ubay-ubay na nga mga personalidad sa kalibutan sa showbiz sama sa banggiitang mang-aawit nga si Luke Mijares, multi-awarded TV host Angela Calina, Born Diva Raki Vega, bokalista sa banding Cueshe Jay Justiniani ug uban pa.

Sa SNG usab naggikan ang mga natural nga talento sama nilang Kristine Fernandez nga nahimong finalist sa mabulokon nga "Search for a Star in a Million," Franz Ocampo usa sa mga finalist sa SCQ National Teen Quest, Bb. Pilipinas 2005 2nd runner-up Melanie Ediza, ug Bea Villegas, nga maoy representante sa tunga-tungang Kabisay-an alang sa ipahigayon nga Miss Teen Philippines karong Mayo didto sa Manila.

Si Adrian Diongzon, Executive Producer sa SNG, mapasigarbohon nga miasoy nga dili lang mga ambongan ug maanyag ang mga pambato sa SNG, sanglit sa wala pa sila mahisakop sa maong pasundayag, duna na silay gikulit nga kaugalingong ngalan isip mga models, product endorsers, performing artists ug beauty pageant titlist.

Dungan niini, mipaambit usab ang mga cast sa SNG sama nila ni Cathy, Handrew, Joey, Sunshine, Sheda, Carliz, Janice ug Roy nga ang dili gayud nila makalimtan sa show mao ang kasinatian. Ug gawas nga makalingaw, daghan pud sila og nakat-onan pinaagi sa show. Gani ang SNG ilaha na nga giisip nga usa ka pamilya. Ug sa pagtapos niini, miangkon sila nga mingawon gayud sila sanglit wala na silay paaboton matag Sabado. Matud pa ni Janice, bisag kapoy na siya, apan kon mahisgotan nga Sabado na usab, malipay na siya. "Ang SNG man gud ang mo-charge nako," dugang pa niya. Gawas pa, ang SNG ang nahimo nilang sukaranan sa pagkab-ot sa ilang mga damgo.

Busa bisan sa kadaghan sa ilang mga buluhaton, padayon gihapon sila ug gani, garbo kaayo silang milungtad kini og napulo ka tuig. Ug kon bisan wala pa sila maapil sa sinugdan, apan sa pagtapos kabahin sila, lipay na kaayo sila niini. Asoy pang Cathy, "at least we carry over the legacy of the previous hosts, performers, talents tanan nga nagpaluyo sa SNG, that's why it made itself on top for ten years."

Midugang pa ang mga cast nga dako kaayo og natabang ang show sa ilahang tagsa tagsa ka kinabuhi. Tungod niini, nakakat-on sila nga magmapaubsanon, magmapasalamaton ug magmaampingon sa ilang mga lihok sa ingon nga dili sila makapasakit sa uban. Ug matud pa ni Handrew," bisan gamay lang nga gesture like a smile, dako na kaayo na para sa amoa." Ug kon bisan ilang pribadong kinabuhi nahilabtan ug ingon man gisaway sila sa uban, wala kini nila igsapayan tungod kay nasayod sila nga dili tanan malipay ug mahimuot kanila.

Ug sa ilang pagpanamilit, dako kaayo ang ilang pasalamat sa tanan nga misunod ug misuporta sa 'Sabado Na Gyud.' Ang kalampusan sa SNG sulod sa napulo ka tuig timailhan nga daghan ang mipaluyo niini. Motak-op man ang tabil nga nagputos sa ilang mga pangindahay,hudyaka ug pagpakigbisog sulod sa napulo ka tuig, magpabilin sa ilang galamhan ang matam-is nga kagahapon nga maoy magsilbing lamdag alang sa mas mabungahon ug mas mahayag nga kaugmaon.