Sa kiliran sa Anghel

Taod-taod na sukad mipanaw si Miko Sotto, hinigugma sa batan-ong bitoon nga si Angel Locsin. Sukad sa maong trahedya murag maingon ta nga nahikatolog ang kasing-kasing ni Angel, lahi sa iyang career nga perte gayud ka malamposon.

Kapin na sa duha ka tuig ang milabay (December 29, 2003) sukad nga nasaksihan sa tibuok nasud ang pagbakho sa dalaga atubangan sa patay'ng lawas ni Miko human kini nahulog gikan sa ikasiyam nga andana sa condominium unit nga gipuy-an sa naulahi didto sa Makati. Human niadtong mapait nga kasinatian, kanunay na nga makit-an si Angel sa telebisyon ug sa pelikula nga nagkalain-lain ang ka-love team. Apan sa tinuod nga kinabuhi nagpabiling nag-inusara ang nailhan nga si Darna.

Pero nilabay na katong mga panahona. Si Miko matawag nalang nga kabahin sa iyang kagahapon. Busa karon andam na nga moangkon ang dalaga nga aduna na'y bag-ong nakabihag sa iyang kasing-kasing. Siya walay lain kondili si Oyo Boy Sotto, ig-agaw ra usab ni Miko.

Ang malipayong bida karon sa "Majika" nga nahinabi sa Banat Hugyaw niadtong milabay nga bulan, namahayag nga tam-is ug puno sa bulok ang kinabuhi nga dunay inspirasyon. "Iba 'pag merong inspirasyon para ganahan ka sa trabaho," pag-angkon niini.

Dili pirming makit-an sa kadaghanan si Angel ug Oyo Boy nga magkuyog kay matud pa ni Angel mas ganahan siya nga pribado lang ang ilang relasyon kung mahimo. Gani dili man siya uyon nga silang duha maoy pareson isip loveteam , kay pong pa niya basin duwa-duwaan lang ang ilang relasyon. Apan kung hatagan man gani sila og kahigayonan nga magkauban sa usa ka proyekto, dunay hangyo ang sikat nga young star. "Sana hindi na paglaruan ang relasyon namin. Baka kasi gawan ng isyu..kunwari nag-aaway then kinabukasan magbati," pong pa ni Angel. Matud pa niya dili siya buot nga mahisama sa kadaghanang love team ug real sweethearts sa showbiz nga biktima sa duwa sa maong industriya nga moresulta na hinoon sa panagbuwag.

Apan kondili man gayud hipugngan nga pareson gayud sila ni Oyo sa TV o pelikula ampo lang ni Angel nga "'wag pakialaman ang aming personal na buhay."

Samtang gipalanog ni Angel nga bisan og naila na siya sa showbiz circle nga buotan, mapahiubsanon ug matinagdanon, gipahimug-atan ni Angel nga dili siya perpekto. "Di ako santa, nagkamali rin po ako," ingun pa niya. Miingon siya nga kon ugaling siya nga kanunay siyang kalmado ug hingatawa kini tungod sa iyang pagtuo sa Labawng Makagagahum.

"Kahit may problema dapat marunong tayong ngumiti kasi karamay natin si God," pagtak-up ni Angel sa interview.