Lig-on nga mga kandidata

Lig-on, de kalidad, puros maanyag ug dili magpalupig. In short, mas Hugyaw ang 20 ka official candidates sa Miss Mandaue 2006 kon intandi sa nakalabay nga tuig. Gani, ang beterano na nga choreographer/ director nga si Doy Arradaza mismo miangkon nga mas maayo ang napili nga mga kandidata karon sanglit silang tanan makamao gyud nga manubag. Hinoon, dili ikalimod nga lisud tumbahon ang record nga namugna sa Miss Mandaue 2005 sanglit diha naggikan ang labing maanyag nga babaye sa nasud karon nga si Anna Maris Igpit. Busa ang pagpili sa Miss Mandaue karong tuiga, nagtangag og dakong pangutana: mahisama ba usab siya kang Igpit ka malampuson o molabaw pa?

Pwes karon pa lang hangpa ang 20 ka mga kandidata nga hayan modala na usab og garbo sa Sugbu sa umaabot nga Bb. Pilipinas 2007 sama kang Igpit nga maoy reigning Miss Mandaue gawas nga siya usab ang nakoronahan nga Bb. Pilipinas World 2006. Ania ang bulahan nga mga nakasulod sa top 20, human sa screening nga gipahigayon niadtong April 2 ug gilangkuban sa 50 ka mga malaumon nga mga babaye.

Sila mao si Princess Stephanie Lalwani, Maria Del Carmen Garcia, Phoebecates Perez, Sheina Marie Cubillo, Joelle Kristianne Nepomuceno, Rosemarie Abapo, Bjanesha Manigsaca, Carielyn Encierto, Anais Nuñeza, Imelda Remeticado, Kathy Lynn Atuel, Carlisle Santos, Ma Victoria Salazar, Carole Monique De Leon, Roxanne Cabañero, Kirstie Joan Babor, Nicole Schmitz, Joyce Lacerna, Richelle Therese Borja ug Isadora Maidee Gonzales.

Perteng Hugyawa sa nahitabong press presentation didto sa Super Metro Mandaue niadtong Sabado sa hapon ubos sa paningkamot usab sa chairperson nga si Ms. Lollipop Ouano Dizon, ang bugtong anak babaye ni Mandaue Mayor Thadeo Ouano. Hugyaw tungod kay hapit silang tanan dili gyud magpalupig sa usag-usa ug maniguro gyud nga motubag sa mga pangutana nga gibato ngadto nila. Kon sa binayot pa nga pagkasulti, "hapit silang tanan mopaghot, mogahot ug mokaon og microphone."

Nag-una sa pangutana mao nga kon unsay ilang reaction sa pagbakwi ni Presidente Gloria Arroyo sa death penalty. Lain-lain nga mga rason ang ilang gibatbat apan kon imong tugkaron usa lang ang nagdahonog nga kamatuoran ug kana walay lain kondili nga silang tanan dili uyon sa silot nga kamatayon sanglit ang Ginoo ra ang dunay katungod pagbawi sa sa iyang gipahuwaman nga kinabuhi.

Pipila sa mipakita og maayong labok niadtong hapona mao sila si Cubillo, Nuñeza, De Leon, Schmitz, Babor ug Gonzales. Apan nakatawag usab og atensyon ang kaanyag nila ni Lalwani, Garcia, Encierto ug Borja. Hinoon gamay ra nga basehan ang gipakita nila nga labok niadtong Sabado gumikan kay sama sa naandan na lahi ang mahitabo sa gabii na sa indigay mismo.

Gani ang mga beterana nga kandidata sama ni Atuel ug Salazar naghilom hilom ra man ug motingog lang kon pangutan-on. Si Salazar maoy reigning Miss Toledo ug Miss Minglanilla, mestiza nga masidlakon ang mga mata. Si Atuel reigning Miss Sibonga ug kanunay na nga mahimong finalists sa bisan asa nga pageant. Tinun-an sa medisina ug dunay materyales puertes nga lawas, ikaduha na niyang apil karon sa Miss Mandaue. Last year, nasulod siya sa top 10. Si Babor usab finalist sa Miss Teen Philippines duha na katuig ang milabay samtang si Gonzales kanunay na usab nga molugwa sa mga pageants didto sa iyang yutang natawhan sa Bohol.

Tungod niini angayan nga atangan gyud ang umaabot nga Miss Mandaue 2006 Coronation Night karong Abril 6 diha sa Mandaue Sports Complex. Kini tungod kay dunay mga kandidata nga karong mga panahona, nagpa-ukoy-ukoy pa sa ilang pagpakigtige ug mao nalay inyong mabantayan nga sila maoy mangharos inig abot unya sa gabii sa tanang gabii. Gani, kini maoy sekreto ni Igpit diin kanunay niyang paagi nga maghilom-hilom lamang samtang nagsingabot pa ang pageant apan sa coronation night na, iyagyag niya ang kinatibuk-an sa iyang abilidad aron paglangkat sa korona.

Pwes, kinsay mosunod sa mga tunob ni Igpit? Kinsay mamahimong bolahan? Atangi!