Bingka, giawayan ni Gretchen ug Tonyboy

Bingka ang gitumbok nga hinungdan nganong nagkahiubsanay sila si Gretchen Barreto ug ang iyang uyab nga si Tonyboy Cojuangco ning bag-o lang.

Base sa tsika sa PangMasa nga nakadawat diay og bingka si Gretchen gikan sa iyang higala nga si Marlon Bautista, apan medyo nangabubho si Tonyboy tungod kay nagtuo siya nga gikan kadto kang Senador Bong Revilla.

Mao diay kadto ang hinungdan nganong, atol sa birthday celebration TV host nga si Ricky Lo, nagpunay og ingon si Gretchen nga " na-stress ako, na-stress ako."

Hinoon nasulbad na ang maong isyu busa nahibalik na usab ang maayong pagtinagdanay sa duruha.

Startalk na-outscoop

Kataw-anan diay ang nahitabo sa Startalk niadtong Sabado sa hapon tungod kay wala maapil pagpakita ang tipik sa interview diin mihilak si Philip Salvador.

Ang kataw-anan mao nga, didto na hinoon sa kaatbang nga show ang ETK-Entertainment Konek sa ABS-CBN nakita ang maong esena niadtong Sabado.

Suma pa sa tsika ni kolumnista sa PangMasa nga si Manay Lolit Solis, exclusive diay unta ang maong interview kang Philip apan ang staff sa ETK maoy mihangyo kang Gorgy Rula nga padunganon na lang sila sanglit katapusan na lang sa ETK niadtong Sabado.

Matud pa nga ang gihilakan ni Philip mao ang ponto diin gituki nila ni Gorgy ang kalabot sa iyang anak nga hapit na matawo.

Pwes perting yawyaw ni Manay Lolit tungod kay tagsa ra kaayo unta makita nga mohilak ang usa ka action star sama ni Philip atol sa TV interview.

Ethel gipanalipdan

Gipamugos sa mga fans ni Ethel Booba nga dili ang eskandalo niini ug ni Alex Crisano didto sa Boracay ang hinungdan nganong hapit na tangtangon ang mga shows sa host sama sa Extra Challenge ug Jologs.

Apan ang mga himantayon sa kaolohan miingon nga dili kana maoy isyu, kondili angayan hunahunaon nga nagsuka na ang mga tawo tungod sa mga eskandalo ni Ethel busa wala na silay gana nga motan-aw sa maong mga shows.

Nagpabilin karong dakong pangutana, asa puniton si Ethel kon wala na siyay mga shows o sa higayon nga hingpit na nga mawa ang ang Extra Challenge ug Jologs.

Sunshine, wa igkita

Missing in action ang beauty ni Sunshine Dizon sa finale kagahapon sa Encantadia sa SOP.

Namahayag ang mommy ni Pirena este Sunshine nga wala siya masayod hain ang iyang anak apan miingon si Manay Lolit nga hayan nagkahiubsanay na sab ang inahan ug anak karon maong mipahilayo ang dalaga nga wala magpahibaw.

Daghan ang nausik sanglit upat ang bida sa Encantadia apan si Sunshine kansang papel isip Pirena gipasidunggan, mao ra gyuy wala sa finale.

Ang Encantadia kutob na lang karong Biyernes.