Umaabot nga rayna sa kaanyag

Batan-on, sakto sa gitas-on ug labaw sa tanan maanyag. Mestiza, sanglit dunay dugo nga French ug naghupot og tulo ka citizenship-French, American ug Filipino. Sa pangidaron nga 17 karon, siya duna nay gitas-on nga 5"8 ug duna nay gamay nga kurbada ang lawas. Presko ang dagway busa dili kahibudngan nganong mangilog gyud siya og atensyon bisan kon hilom siya nga musolod sa usa ka lawak nga dunay daghang tawo. Siya si Carla Humpries, sakop sa Star Circle Batch 11 sa ABS-CBN ug karon kabahin sa labing bag-o nga pelikula sa Star Cinema nga "D Lucky Ones."

Magduha pa lang ka tuig si Carla sa showbiz ug karon inanay na siya nga mihimo og iyang kaugalingong kasikas. Una siya nga nakita sa 'Sarah, The Teen Princess" ug nasundan kini sa teleseries nga 'Sanay Wala ng Wakas." Apan sa wala pa ang maong mga kahigayonan, nahisakop una siya sa Fresh Girls sa variety show nga ASAP. Apan ang kahigayonan mihangop kang Carla sa dihang nahilakip siya sa teen oriented program nga Qpids,- ang show sa ABS-CBN nga gitumong aron pagkaplag og bag-o nga loveteam. Bisan si Paw Diaz ug Mikel Campos ang midaug, wala kapugngi nga naila usab og maayo sa publiko si Carla sanglit guapa ug madanihon gyud ang iyang dagway. Si Janus del Prado nga maoy iyang pares karon sa "D Lucky Ones" maoy napili isip loveteam niya sa Qpids.

Si Carla nga nahiuban dinhi sa Sugbu nilang Sandara Park, Joseph Bitangcol, Nikki Valdez ug Janus niadtong Sabado namahayag nga kaniadto pa gusto na gyud siya nga mag-artista. Iyang gitug-an sa Banat Hugyaw nga didto siya mahi-mugso sa Amerika, apan mibalhin na og puyo ang ilang pamilya dinhi sa Pilipinas dihang eight years old pa lang siya. Sukad niadto damgo na niya nga musonod sa tunob nila ni Sharon Cuneta ug Claudine Barreto.

" Gusto ko talaga leading lady. Na-typecast kasi ako dahil mestiza medyo pangkontrabida ang naibigay na roles sa akin. Gusto kasi nilang packaging ko pang-Studio 23 pero nag-aral talaga ako ng tagalog," pong pa niya atol sa presscon didto sa Krua Thai SM niadtong Sabado.

Sa samang higayon giangkon usab nilang duha ni Janus nga "nagka-developan" gyud sila sa dihang nagpadayon pa ang Qpids apan ilang gipakgang sanglit ang ilang trabaho maoy ilang priority. "She still too young so we decided na career first. I have responsibility with my family rin," pasabot ni Janus. Samtang si Carla midason sa pag-ingon nga "Nagkadevelopan talaga kami kaya lang hindi pa ako ready to commit to a relationship. Marami pa akong gustong mangyari sa career ko."

Sa pagkakaron nangandam na si Carla sanglit apil siya sa cast sa 'Bituing Walang Ningning" nga pagabitoonan ni Sarah Geronimo alang sa ABS-CBN. Igsuon ni Angelika dela Cruz ang iyang papel nga matud pa niya usa ka battered child busa gikalipay kini niya og maayo sanglit masukod gyud ang iyang acting ability sa mao nga role.

Sa dihang giingnan sa Banat Hugyaw nga dako kaayo siya og tsansa nga modaug sa Bb. Pilipinas kon ugaling mosalmot siya, si Carla miingon nga wala pa mosulod sa iyang hunahuna ang maong indigay diin iyang gibutyag nga daghan na ang miingon niya nga 'beauty queen material" gyud siya. Matud pa niya nga bata pa kaayo siya ug dili gyud niya hilig ang mga indigay sa kaanyag sanglit gusto niya nga mahimong aktres. Miingon si Carla nga dili usab siya komportable nga mag-swimsuit gani napugos lang siya pagsul-ob og "one-piece" sanglit gipangayo sa iyang role sa D' Lucky Ones.

Hinoon sa dihang padulong na sila nga mopasundayag didto sa SM Entertainment Plaza, si Carla nakig "beso-beso" kanako aron magpasalamat, hinungdan subli nako siyang gidasig sa pagsalmot sa Bb. Pilipinas. Mipahiyom siya, milakang pahilayo, dayon milingi ug miingon, "Sige po, pag-iisipan ko po," una hingpit nga mibiya.

(Ang D' Lucky Ones" ipasundayag sa mga sinehan lukop nasud karong Abril 15).