Alfred nagnilabad, naghubo ug nakasab-an

Gidabodabohan og kasaba ni Lolit Solis ang usa sa iyang mga manok nga si Alfred Vargas tungod kay wala mananghid ang naulahi nga nag-nude pictorial diay siya alang sa usa ka bold magazine.

Sa column ni Manay Lolit Solis sa PangMasa karong adlawa gipadayag sa gamhanan nga talent manager nga wala gayud siyay kalabutan sa gibuhat ni Alfred ug wala pa siya tawgi sa iyang mga kaila.

Matud ni Lolit nga sa pagkatinood lang wala niya ikalipay ang gibuhat sa iyang talent pun-an pa nga dili man gyud solo si Alfred sa cover sa maong magazine.

Miingon si Manay Lolit nga iyang gikasab-an si Alfred dungan sa pagtambag niini nga kon ganahan man gyud diay kini nga maghubo maayo pag moapil na lang kini sa Ginoong Pilipinas kay mas sosyal pa.

Gidugang ni Manay nga wala usab mahimoot ang hari sa Seiko Films nga si Robbie Tan sanglit imbes naka graduate na si Alfred sa paghubo-hubo nagnilabad man hinoon kini.

Naglibog si Manay Lolit unsa gyuy gusto ni Alfred nga packaging, dramatic actor o bold star? Daboy out

Samtang gitino ni Manay Lolit Solis nga ang lain usab niya nga talent nga si Rudy Fernandez kumpirmado na nga dili makadayon og apil sa 'The Manny Pacquiao Story."

Kini tungod kay matud pa niya, nagpaalim pa si Daboy sa iyang mga tahi human kini operahi sa gallbladder ug dili sila buot nga mabughat kini.

Matud ni Lolit wala niya pangandoya nga mabughat si Daboy busa kinahanglan nga mopahuway una kini. Makisig ang grand champion?

Nagdahonog ang panag-an nga si Makisig Morales ang mamahimong champion sa Little Division sa "Little Big Star" atol sa Grand Finals ugmang adlawa.

Ang nahisgotan nga nine-year-old kid maoy labing una nga Star of the Month sa Little Division.

Singing sensation ang giangga karon kang Makisig apan gawas sa pagka singer niini busy usab diay siya sa Taekwondo apan iyang gitin-aw nga singing gayud maoy top priority niya.

Sa Grand Finals ugma contest piece ni Makisig ang kanta nga "Ikaw Lamang" diin gipadayag niya nga nakuyawan siya tungod kay matud pa ngilngig usab og tingog ang iyang mga kontra nga sila si Kyle Balili ug Raph Salazar.

Ang ubang finalists mao sila si Sam Concepcion, Charise Pempengco and Gian Carlo Barbarona sa Big Division.