Kasikas paingon sa kabantog

Nangandoy ka ba nga maila sa tibook kalibutan sa natad sa awit? Damgo mo ba nga makaapil sa nabantog na nga American Idol? Pwes ayaw na pagdamgo pa, hinonoa bukha ang imong mga mata ug sa samang higayon pangatoli aron tataw nimong mabati ang mga kasikas nga nagsugod na pagkanaas ning mga panahona. Dili na ikaw kinahanglan nga molupad paingon sa Estados Unidos aron mahimong idolo tungod kay karong pipila ka adlaw makabaton na ang tanang mahiligon sa kanta kahigayonan aron mosikat dinhi sa iyang kaugalingong nasud.

Philippine Idol- kini maoy imong yawi paingon sa katumanan sa imong damgo. Ang maong indigay susama ra og gibug-aton sa American Idol nga pasi-ugdahan unya sa TV station nga ABC-5. Ang mananaug sa maong indigay isangka sa umaabot usab nga Asian Idol ug makabaton usab og higayon nga mahimong guest performer sa American Idol. Labaw sa tanan kon mopatigbabaw gyud ang abilidad sa Pinoy sa tibook Asya, pwes diretso na ang mamahimo natong representante sa World Idol. Ang byahe paingon sa kabantog sugdan na karong buwan sa Hunyo.

Usa ka audition ang ipahigayon dinhi sa Sugbu karong Hunyo 23 aron pilion ang 25 ka mga pambato nga maoy makigtige didto sa kauluhan batok sa 75 usab ka mga contestants nga maggikan sa Davao ug Manila. Gikan sa 100 ka mga contestants, 30 ang kuhaon aron adto pilion ang napulo ka semi-finalists. Gikan sa napu upat lang ang kinahanglang magpabilin aron maoy hingpit nga mag-ilog sa titulo nga Philippine Idol.

Kon unsay mga sukaranan ug istilo sa pagpili sa American Idol mao ra usab ang mahitabo sa Philippine Idol. Busa gikinahanglan nga ang mosalmot lumad nga Pilipino, nag-edad og 16 ngadto sa 20 anyos ug labaw sa tanan walay kontrata nga gipirmahan sa bisan unsa nga recording company o talent management agency.

Sa Hulyo sugdan na ang first episode sa Philippine Idol diin padayon pa karon ang negosasyon alang sa mamahimong host unya sa nahisgutang indigay. Sa pagkakaron usa pa lang ang sigurado, ang multi-awarded musician nga si Maestro Ryan Cayabyab usa sa molangkob isip hurado.

Pwes nangandoy ka ba nga mosunod sa tunob ni Jasmine Trias? Karon pa lang, sugdi na pag-ensayo aron pag-abot sa tukmang panahon dili lang Amerika ang imong sakopon kondili ang tibook kalibutan gyud!