Mga tigbalita naglibog ni Gretchen

Gibati og kalibog ang mga sakop sa entertainment press kang kanhi Sex Goddess Gretchen Barreto tungod kay wala kini klarong baruganan kalabot sa movie project nga gitanyag sa Imus Production ngadto niya.

Last week miingon siya nga dili siya mosugot sanglit guest role lang siya isip asawa ni Senator Bong Revilla, sanglit ang iyang gusto nga kon ugaling mobalik gyud siya soap opera ang iyang buot gam-on.

Sa interview niya ning bag-o lang suma pa sa PangMasa nga miingon si Gretchen nga gidawat na niya ang tanyag tungod kay misugot man ang iyang kapuyo nga si Tony Cojuangco lakip na ang iyang anak.

Apan duna na usay taho nga bisan og gitugtan na siya sa iyang pamilya, dili na lang gyud dayonon ni Gretchen paghimo ang nahisgutang proyekto tungod kay mas gusto siya nga magpabilin silang managhigala ni Lani Mercado, asawa ni Bong.

Matud ni Gretchen nga dili siya buot nga ang nahisgutang pelikula nga dunay working title nga "Pusong Punsoy" himoan unya og intriga sa mga himantayon, sanglit 10 years ago duna man silay relasyon ni Bong.

Guest role lang si Gretchen sanglit base sa script mamatay ang asawa ni Bong ug mosulod sa eksena ang character ni Ai-Ai delas Alas. Karon nga medyo walay klaro si Gretchen dunay mitambag nga si Cindy Kurleto na lang ang kuhaon sanglit maanyag man usab kini.