Indephums, by request!

Kining maong artikulo gihalad sa mitaliwan na nga si Rolando de Guzman kansang gugma sa musika nakahatag ug inspirasyon sa pagsulbong sa usa ka local nga banda, ug alang usab ni Dianne Amores nga mihangyo pinaagi sa text nga pasidunggan ang paningkamot sa Indephums - lain na usab nga pundok sa independent nga mga Bisrockers.

Si Renan Cuizon (gitarista), manghod ni Ryan (tambolista) ug uban kang Ronan de Guzman (bahista, anak ni Rolando nga mibahin sa iyang talento sa iyang anak may kalabutan sa pangmusika), kuyog ni Raymund Arsenal (vokalista) hinugpong gitawag og Indephums, nga dinugtong sa "Independent Humans."

Sa pakigkukabildo kanila sa mismong panimalay sa mga Cuizon sa Sunrise Village, barangay Pardo, Cebu City, nahibaw-an ning tagsulat ang mga panlimbasog sa pundok alang sa pagduso sa paningog nga Sugbuanon diha sa mga kanta. Apan dili lamang kutob sa tuno, o melodiya, kuting sa gitara, laylay, o sa pagtaghoy, kon dili gusto gayud sa Indephums nga matagaan ang Sugbuanong pinulongan sa respeto ug dignidad diha sa local mainstream music making nga dugay na niining angay matagamtaman.

"We have chosen this name because the four of us are independent humans. But mao ra ni independent nga manawag gihapon og mama ug papa," pamulong pa ni Raymund nga sagol ngisi.

Nagkadaiyang emosyon nilang Renan, Ryan ug Raymund ang naglimin sa mga liriko nga ilang gisulat basi sa ilang pagka romantiko, pagkalawgaw, ug pagpakabana mahitungod sa mga nagbaga nga isyu may kalabutan ang kalambuan sa komunidad.

Ang mga lyrics naglangkob sa maanindot kaayong panghuna-huna sa upat ka mga lalaking adunay dakong gugma sa ilang gipiling natad sa arte. Ginamit ang ilang rockista nga impluwensya, nakamugna sila og unom ka tracks nga makapauyog bisan pa man sa mga kritiko sa Bisrock nga musika.

Gawas sa akong pagdayeg sa sipa, makabungog, makapatay-og ug nagdahunog daw dugdog nga drumplay sa Indephums, nakadayeg usab ako sa ilang baruganan nga molikay sa karaan nga konsepto sa pagka rockista.

Sa karaang rock music school man gud, ang mga rockista nabilanggo sa ilang mga bisyo may kalambigitan ang drugas, kahilayan ug ang pagsimba sa pasalig sa kahayahay gumikan sa ilang pagsikat nga kon buot huna-hunaon lumalabay lamang.

Alang sa Indephums, mas nindot ang "high" nga dinala kon sakto ang imong dalan nga subayon ug nga responsable kas imong lihok labi na kon makita na unya ang respeto nga ihatag kanimo sa tawo, ug sa unsa ang ilang mahinumduman mahitungod kanimo.

"Negatibo", ang carrier track sa ilahang 2005 Extended Play album, nagkanayon "kinsa katong magpa-ubos bulahan, kung ikaw tawo palabi ra kaayo, tan-aw nimo ikaw ang gamhanan, sige padayon sa imong pagtoo kay ikaw mahulog sa kayo." Sa laing bahin, ang "Limitasyon" nga usahay maalaan ang titulo og "Maayo Kang Sunogon" naghisgot og kinutoban. "Milapas ka sa imong limitasyon mas maayo nga ikaw mamalandong; kay tan-aw mo sa imong kaugalingon way molabaw maayo kang sunogon. Mas daghan og amigo kung ikaw maayo, mas daghan ang mutabang og dili ka hikalimtan"

Usab, nakadayeg ako sa track nga "Insakto" kay insakto gayud ang pagka-arrange sa maong kanta. Dali masakyan ang iyang tuno ug may tenor sa pagpangaliyupo, "Dungga, akong pangandoy paminawa kay kini intawn panagsa ra, dili mahimong kaduha, dungga ayaw intawn deadmaha, kay ang sakit di na makaya, insakto na"

Ang "Hukom (Suya)" usa ka paagi sa pagtuki sa sikolohiya sa suya (envy). "Ngano man jud ang tao masuya, kung masuya ka ikaw ang ala-ot, kalmahi ug atimana imoha, ngano man makatabang ba na? Magkahi-usa kitang mga igsoon, pag-inamigo palam-boon. Sakto ang giingon dili ka makabasa sa huna-huna sa isig katawo mao nga ayaw dali-dali ug hukom"

Uban nga tracks niini mao ang "Hulmigas" nga bunga sa nagdamurang imahinasyon ni Renan kansa gikamangan og hulmigas samtang nagsista-sista. Human niadto nakahukom siya nga buhatan og kanta ang maong hulmigas nga gilok kaayong nagrampa-rampa sa iyang tiil ug bitiis. Ang ikaunom nga track mao ang "Angay Na Ba?" nga may tema sa gugma nga napalgan ug gugmang napagngan sa dagitab.

Ang 2005 EP Album tag P50 lang ug may dalang pahimangno batok sa mamiratahay: "Sa mga mopirata aning CD maayo unta kuhaon namo ni Lord. Kamo ang hinungdan nganong di na mi makabuhat og album," pung pa sa usa ka Mondoy nga maoy miprodyus ug midesenyo sa CD jacket pinaagi sa creative works sa Rayhoundz Archives.

Tanang kanta sa EP album girecord sa Backyard Project Studio ug sila mapasalamaton kang Hanz Nator sa bandang Econo140 alang sa pag-mix, kini nahibaw-an ning tagsulat pinaagi sa gipahigayon nakong music streaming sa www.myspace.com/indephums.

Laing makapatagad nga huni gikan sa Indephums, mao ang "Path of Silence" nga mamahimong kabahin na sa mga materyales alang sa ilang ikaduhang album.

Sa wala pa namo tak-upi ang maong pakisayod, miapelar ang Indephums sa local music market, "People of Cebu, you can request our song Negatibo sa 93.1 Smash FM through DJ Ram and DJ Bré Ambungan. Suportahi ang local ug Bisaya nga musika. If you guys don't like Bisrock, ayaw lang sawaya. Let's respect our individuality."

Sulati ang Indephums sa [email protected]. Alang sa gigs, tawagi ang 0926-3346472/0922-4622475.