Taga Mandaue nautangan ni Rustom

Usa sa giingong nautangan ni Rustom lumad nga taga Mandaue City nga karon atua na manimuyo sa Los Angeles California ug dunay franchise sa Jolibee didto sa maong lugar.

Kasaligan nga tinubdan sa Banat Hugyaw nga usa sa naglangkub sa Special Task Force sa National Bureau of Investigation nga maoy nag-imbestiga sa kaso ni Rustom niila sa negosyante nga taga Mandaue City nga si Julius Espina.

Suma pa sa taho nga si Rustom nakautang og Mercedez SLK kang Espina ug tulo na kini niya ka tuig nga gidata-datahan apan kalit lang nga miuli ang nahisgutan nga kanhi PBB housemate busa nagpakitabang sa NBI ang Mandauehanon nga negosyante.

Ang ahente sa NBI mibutyag nga mokabat pa sa 42, 000 dollars o mokapin pa sa P2 million ang bayranan ni Rustom kang Espina. Gidugang sa tinubdan nga andam si Espina nga iatras na lang ang kaso sa kondisyon nga ibalik ni Rustom ang nahisgutan nga sakyanan.

Miingon ang tinubdan sa Banat Hugyaw nga mas maayo gyud nga boluntaryo nga migawas gikan sa 'Bahay ni Kuya" tungod kay kon nagmagahi pa kini padad-an nila og imbestigador sa sulod sa balay aron hinabian sa confession room ang nahisgutan nga kanhi housemate.

Base sa imbestigasyon sa NBI ang maong utang namugna dihang nagtungha pa og filmmaking si Rustom didto sa Estados Unidos.

Pangutana sa Banatay niadtong Lunes: Tuo ba mo nga tungod sa gibilin nga utang ni Rustom didto sa Amerika o tungod kay natuman na niya ang iyang katuyuan maoy hinungdan nga boluntaryo siya nga migawas sa "Bahay ni Kuya" niadtong nakalabay nga semana? Tubag ipadala sa 09102683713

* * *

Pinahiluna ang style ni direk Lino Cayetano ug dunay taho nga kaniadto sa dihang wala pa mosalmot si Bianca Gonzales sa Pinoy Big Brother Celebrity edition batasan na nila nga sugdan pinaagi sa morning prayer ang ilang adlaw.

Tsika sa PangMasa mao nga magpadad-anay og text silang duha kon unsay panalangin nila alang sa usag usa nianang adlawa.

Ang komentaryo sa mga himantayon mao nga gawas nga relihiyoso si Direk Lino posibling nasobrahan na kini ka busy sa iyang trabaho hinungdan nga nakalimtan na niini ang mga panginahanglanon sa iyang girlfriend nga si Bianca.

Suma pa nila nga posibling mao ni hinungdan nganong dali nga napukaw ang "wild side' ni Bianca dihang gibirigbirigan na siya ni Zanjoe sulod sa Bahay ni Kuya.

Samtang usa ka ginganlan og Ana Santos nagpadala og picture ngadto sa PangMasa sa giingong hawkanay nila ni Zanjoe ug Bianca sa sulod sa "Bahay ni Kuya" diin iyang gipanghimaraot si Bianca gumikan sa pagkamaluibon niini.

Apan duna usay ginganlan og Chris Dy nga miingon nga ilad ang giingong picture sa paghawkanay nila ni Zanjoe ug Bianca tungod kay ang maong hulagway nakuha niadtong nag-spaghetti contest si Big Brother busa ang isig katumoy sa noodle naa sa mga baba sa duruha.

Matud ni Dy nga wala man gani gyud magtakdo ang mga ngabil ni Zanjoe ug Bianca sa giingong kontrobersyal nga hulagway.