Rustom nagbilin og utang sa Amerika

Utang ang hinungdan nganong nagdali paggawas sa 'Bahay ni Kuya" si Rustom Padilla ug dili ang kabalaka niini nga mapun-an ang kontrobersya sa iyang pag-angkon nga usa siya ka bayot.

Ang tinubdan sa PangMasa nagkanayon nga nakautang diay si Rustom og salapi sa usa ka bangko samtang didto pa siya nanimuyo sa Amerika.

Suma pa sa PangMasa nga sa dihang mibiya si Rustom sa Amerika last year wala niya bayri ang iyang utang busa gisuwayan siya paggukod sa mga kadagkuan sa bangko.

Apan ang mga taga-bangko walay ideya asa si Rustom sa Pilipinas pangitaon hinungdan nga nagpakitabang sila sa National Bureau of Investigation.

Sa dihang ang mga taga bangko nasayod nga usa sa mga housemates sa Pinoy Big Brother si Rustom, dali sila nga nakig-alayon sa NBI nga dali usab nga mipadala og suwat ngadto sa ABS-CBN kalabot sa gilayasan nga utang ni Rustom.

Giingong ang mga ahente sa NBI personal usab nga nakighinabi sa mga kadagkuan sa PBB nga sila si Ms. Linggit Tan ug direk Lauren Dyogi kalabot sa sitwasyon ni Rustom.

Dugang tsika sa PangMasa mao nga nakautang usab si Rustom sa iyang business partners ug pipila ka mga higala.

* * *

Giingong mipatulo og mga luha ang kanhi presidente sa ABS-CBN nga si Cito Alejandro samtang nanamilit siya sa iyang mga Kapamilya suma pa sa tinubdan sa PangMasa.

Ang tsika sama sa ato nang nabalita dinhi sa Banat Hugyaw mao nga si Alejandro mobalhin na sa Del Monte Corporation.

Matud pa nga si Mr. Alejandro mitambag sa management nga angayan nga "insider" ang kuhaon nga hulip alang niya inay "outsider"sama niya.

Suma pa nga wala diay mauyuni sa gagmay'ng mga empleyado sa ABS-CBN si Mr. Alejandro tungod kay wala mauyuni ang mga lagda nga iyang gipatuman kaniadto.

Usa na niini ang paghimo na nga P150, 000 sa usa ka 30-second commercial inay ang naandan kaniadto P80, 000 lang diin tungod niini giingong nawad-an og interes ang mga advertisers.

Matud pa nga ang kamahal sa presyo maoy hinungdan nganong dili unta madayon pagpasalida ang book two sa Panday.

Suma pa nga namalik na ang mga advertisers human gikunhuran ang presyo aron hingpit na usab nga masalida ang book 2 sa nahisgutang pantaserye sunod buwan.

* * *

Samtang laing rason nganong nadugay ang pagbalik sa "Panday" mao ang walay puas nga atake sa hubak ni Heart Evangelista.

Matud pa nga sa matag higayon nga atakihon siya sa iyang hubak, mamugos gyud si Heart nga kinahanglang naa sa iyang kiliran si Jericho Rosales busa mahunong usab ang taping. Samtang lisud man tuohan apan duna usay taho nga duna usay problemang pinansyal si Heart diin matud pa giangkon mismo sa dalaga nga wala siya makahibaw giunsa paggamit sa iyang pamilya ang iyang P20 milyones nga kinitaan.

Hinungdan nga miabot sa ponto nga midesisyon si Heart nga maglain na og puyo, lakang nga wala mauyuni sa iyang pamilya hinungdan nga gibasul nila si Jericho nga responsabli sa tanan.

Sa dihang nalandig si Heart sa St. Lukes Medical Center human giatake sa iyang hubak giingong nanawag si Jericho sa mommy sa dalaga.

Apan pag-abot sa mommy ni Heart, matud pa gisugat kini ni Jericho ug giingnan nga "Tita, she's not ready to see you," butang nga nakapahiubos sa inahan.

Sukad niadto wala na sila manggilabot kang Heart ni nakig-communicate pa sa dalaga hinungdan nga wala gani diay masayod ang pamilya sa dalaga nga nagkuyog silang duha ni Jericho og bakasyon didto sa Maui Hawaii.