Mga malaomon

Dili batasan ni Edgar Escalante , ang ambongang umagad ni Josie S. Pereyra (JSP) nga kanhi reporter sa Banat News ug The Freeman nga karon star reporter sa ABS-CBN Central Visayas ug DYAB-Abante Bisaya, nga magsaulog sa iyang adlaw'ng natawhan. Apan lahi ang nahitabo niadtong Huwebes sa gabii, Marso 16, kay nagsaulog gyod siya uban sa maanyag niyang kapikas sa kinabuhi nga si Chona Pereyra Escalante, ang only daughter ni JSP, kauban usab si JSP mismo, mga pipila lamang sa suod nila sa ABS, suod pod nga mga entertainment columnists, pipila ka suod nga kaparyentihan, ug pipila ka taga Guinsaugon, Southern Leyte nga matud pa, usa sa hinungdan gyod nganong gisaulog ni Edgar ang iyang adlaw nga natawhan karong tuiga.

Atol sa maong tipon-tipon gipadayag ni JSP nga hapit na ipasalida ang pelikula nila ni Sandara Park ug Joseph Bitangcol nga giulohan og "D Lucky Ones." Gipahibawo usab niya nga ipasalida na usab ang lilas nga "Mission Impossible" apan, ang nakaparat, kay wa pa sad niya ma klaro kon si Tom Cruise ba ang bida. Pero kinsa man sad diay? Hinoon, matud niya, mala-umon siyang mokita ang duha ka pelikula.

Namahayag usab siya nga bisan kono'g mao pay pagsugod sa paggaling [shooting] sa "The Manny Pacquiao Story" diin ang katapusang leading lady ni Jericho Rosales mao gyod si Bea Alonso, dako kono'g paglaom ang producer nga si Rose Flaminiano sa FLT, nga mokita ang pelikula diin, apil usab si Rudy Fernandez [the actor, not the athlete] sa papel nga boxing instructor ni Pacman.

Samtang niadtong Biyernes sa buntag ang mga dagko kaayo og mga pagsalig ug mga mala-umon nga mga tawo nagtapok usab didto sa Entertainment Plaza sa SM City aron mapirmahan na sa katapusan ang Memorandum of Agreement nga magtugot sa Ramon Aboitiz Foundation nga maoy moggunit sa kwarta alang sa scholarship sa mga estudyante nga taga Guinsaugon nga nahimong ilo human mabiktima sa trahedya ang ilang mga kabanay. Ang mga concerned citizens nga misaksi, nahimong emosyonal sa maong higayon.

Ang pipila gani nakapatolo gyod sa ilang mga luha sanglit, makapatandog gyod sa balatian ang maong okasyon. Hinungdan man gani nga si maam Trixie Tolentino sa ABS, nga tearful usab, nakaingon gyod nga ang maong hitabo, angayang himoan og pelikula. Gani, miingon siya nga giplano na sa Star Cinema ang usa ka sugilanon nga mo-sentro sa magsoong nawad-an sa ginikanan ug igsoon. Dungan niini gipadayeg ni Kapamilyang Leo Lastimosa ang iyang kinasingkasing nga pasalamat ngadto sa mga kadagkuan sa University of the Visayas tungod nga mihatag og full scholarship sa mga taga Guinsaugon nga mga estudyante sa nahisgutang unibersidad.