Hangpa ang Entablado

Ang Sugbo maoy giisip nga "home of singing divas" sanglit kanunay na kita nga mangharos sa bisan asa nga indigay sa awit ilabi na didto sa kauluhan. Dulce, Pilita Corales,Verni Varga, Vina Morales, Ana Fegi, Sheryn Regis, Raki Vega, Manilyn Reynes ug Jimmy Marquez. Sila Pipila lang sa mga mikulit na og ngalan sa nasudnong entablado sa kalibutan sa musika. Gani ning bag-o lang lain pa nga Sugbuanon nga si Rizza Navales ang nangharos sa bangga sa kanta sa tibuook gyud kalibutan nga didto gipahigayon sa Hollywood.

Kini maoy hinungdan nga sugod karong adlawa ug sa mga Martes nga tanan atong nuntan ang mga panghitabo nga naglibot sa labing dugay na nga bangga sa awit dinhi sa Sugbu- ang dyLA Supershow. Pinaagi dinhi sa Banat Hugyaw among ihatod kaninyo ang resulta sa matag Domingo nga indigay. Dali ug atong nuntan ang mga ngalan nga karon nagsugod na og sikad paingon sa kabantog kay basin ugma damlag sila na usab ang maghari sa entablado sa musika.

Giduma ni Fred Languido ug tita Pines Go, ang dyLA Supershow dunay duha ka bahin- Wee wee show time alang sa mga bata ug Big Show Time alang sa mga dagko. Sa umaabot nga mga adlaw atangi ninyo dinhi lang sa Banat Hugyaw ang mga finalists sa nahisgutan nga indigay aron mas maila pa ninyo sila og maayo ug sa samang higayon masayran usab ninyo ang istorya sa ilang pagpanimpad paingon sa tumoy sa kalampusan. Busa sa dili pa sila hingpit nga mosikat sa entablado sa nasud ato una silang hangpon, duyogan ug abibahan dinhi sa atong kaugalingon nga entablado.

Buot ba nimong manimpad? Suwayi pag-audition matag Sabado sa alas nuwebe sa buntag diha sa estasyon dyLA nga nahimutang sa pier 1 ning dakbayan.

Ania ang resulta niadtong Domingo Marso 19, 2006. Wee-wee Show Time
First- Dayanara Joan Truz
Sambag 11 barangay Guadalupe
Second- Arvin Jay Loreto
Barangay Lahug
Third- Jason Beloria
Sitio Tabaska barangay Mambaling
Defending champion for three weeks- Karen Cabuenas
Big Show Time winners:
First- Herbert Garsola
Barangay Pusok Seaside Lapu-Lapu City
Second- Glen Alivio
Barangay Talamban
Third-Riel Legaspi
Sitio Tabu-canal barangay Pardo