Tubag ni Jayson ngadtong Novo

Kay usa man ko sa nagdapit sa mga sakop sa media niadtong Miyerkules sa udto, Marso 16 (og daghang salamat sa nangregalo og mi greet nako'g happy birthday ayaw na lang mo pangutana'g pila na intawon ang akong edad, aron dili mo kuyapan,labi na among publisher nga mitakilid aron pagkoot sa katapusan sad niyang sobra sa iyang sweldo para lang duna koy ikapalit og snacks), misayo ko'g adto sa studio, sa Cebu Catholic Television Network,kay maulaw man ta nga kitay manawag sa mga sakop sa media unya, wa ta sa venue aron moabi abi nila, kay mokurog baya good kog mga sakop sa media, labi nag mga editor.

Apan sa wa pa moabot ang mga entertainment writers ug editors, nasiplatan nako ang usa ka familiar face, nga naguyod gyud sa usa ka wheelchair ug naggunit pa'g usa ka dextrose sa usa ka participant sa batch 36 sa Light In the Spirit Seminar, nga niadtong tungora miapil sa seminar nga nag-wheelchair. Ang naguyod, nagsul-ob og uniporme sa usa ka nurse, usa ka nursing student, ug sakop usab sa Oasis of Love, si Jayson Jabonero, ang napili sa CCTN nga maoy himoong host sa project ni Novo Bono, Jr. nga "Search For The Southern Star," nga gikataho nga, wa kono magustohi ni Novo, apan miinsister ang kadagkoan sa CCTN, nga siya gyo'y himoong host. Kini ang buot nakong masayran. Unsay reaction niya sa maong taho? Nganong desidido ang CCTN, nga siya gyod ang host?

"Kay tabian ko. Tabian pero dunay unod ang akong gipanulti. Duna koy authority sa akong giluwatang mga pulong. Dili ko magpataka og sulti kon wa koy kasayuran sa usa ka topic, pero luckily, daghan kog nasayran. Mao na hinungdan nagustohan ko sa kadagkoan sa CCTN, wa pay labot sa taas nakong kasinatian, nga wa masayod si Novo, kay wa man siya mag-research sa akong pagkatawo, kay duna na man pod god siyay nahunahunaan pod nga himoong host, nga wa sad kaayo mauyoni sa CCTN. Because, there are also many things to consider, before you can work for the network, and one is that you have to be a catholic." Letaniya ni Jayson ug nagpasalamat siya nga sa katapusan nakasabot si Novo, sa katapusan, nagkasabot ra gyod sila, ug masugdan na gyod ang taping karong Marso 24, diha sa dakbayan sa Talisay.