Under contract, pero dili pugson

Ginindotan ko sa bag-ong lugar karon nga nahimutangan sa Yo Latino nga naa na karon sa Salinas Drive sa Lahug [hapit maatbang sa BBRC] human kini mobiya sa kanhi nilang nahimutangan didto duol sa The Village, kay ang bag-ong lugar mas dako kaayo og mas exclusive ang atmosphere. Nalingaw pa gyod ko sa mga huni ug awit sa Sabor Latino sa reopening niini niadtong Biyernes sa gabii, Marso 10. Tingali tungod kay ang nagpili sa Sabor Latino nga maoy maglilingaw niadtong gabhiona, si Joe Go, ang kanhi manager sa Vicor nga karon usa na ka iladong negosyante, og suod kaayo sa tag-iya nga si Jojo Teng, nga nakaila usab nako niadtong usa siya sa mga producers sa usa ka show diha sa New Cebu Coliseum, sa cast sa amo kaniadtong tv series nga "Si Goot Da wanderpol"

Sa naasoy nga okasyon, nahinabi nako si Ms. Lollipop Ouano Dizon, ang pang beauty queen nga daughter nilang Mayor Teddy ug Mrs, Linda Ouano. Gipangutana gyod nako siya kon unsay ilang buhaton kon simbako, dili maka turn over si Anna Maris Igpit sa iyang korona sa bag-o unyang Miss Mandaue gumikan unya sa daghan niyang mga kaakohan isip Bb. Pilipinas-World. Sama sa naandan, mipahiyom lang ang kandiisong maanyag nga si Ms. Lollipop ug miingon nga, bisa'g under contract ang mapiling Miss Man-daue, sabton na lang ug dili pugson, ug ang first runner-up na lay hangyoong mo-turn over unya puhon, kon dili gyod makahimo si Miss Igpit. Tuod diay, gipahibawo ni Ms. Lollipop nga ang screening unya na gyod sa Abril 2, ug mas daghan ug dagkong premyo ang nagpaabot sa mga mananaog. Wa pa niya ibutyag kinsa unyay himoong host ug guest performers.