Mga pagpangandam sa piyesta

Karon pa lang andam na kaayo ang dakbayan sa Mandaue alang sa kasaulogan sa pangilin ni Senior San Jose nga maoy ilang patron. Gani, sa dili madugay, magpahigayon na sila sa screening alang sa pilion na usab nga Miss Mandaue 2006 aron maoy koronahan unya sa miaging Miss Mandaue nga si Miss Anna Maris Igpit, ang napili usab dili pa dugay nga Bb. Pilipinas-World.

Apan dili baya ang Mandaue ra ang nangandam alang sa pangilin ni Senior San Jose kon, apil usab sa magsaulog sa pangilin mao ang San Jose Village sa barangay Tisa, busa nangandam na usab sila sa nagkalain laing mga kalihokan.

Matud pa ni Jay Jabonero ug Wonder Laporga, gisugdan na gani nila ang mga kalihokan matag gabii, pinaagi sa pagpanagtagbo, og sugod sa una gyong gabii sa dili pa ang pangilin sa Mayo 1, dunay gitawag og 'Night of Love Songs,' sundan sa sunod gabii sa pagpili sa mahimong Queen of St. Joseph".

Pagka sunod gabii dunay Dance Sports Competition nga salmotan gyod sa mga iladong mananaog sa nagkalain-laing mga dance sports competitions. May ipahigayon usab silang Dance Showdown ug may ihatag silang mga awards alang sa mga nagkalain-laing mga molupyo sa San Jose Village nga nakatampo og kaayohan dili lamang sa San Jose Village o sa barangay Tisa kon dili sa dakbayan sa Sugbo o kaha, sa tibuok lalawigan o nasud.