Himamata si Gerry

Maisog. Dunay kawsa nga gibarugan nga maayo ang pagkaplag sa kamatuoran. Labaw sa tanan dunay baruganan nga dili maliso nungka nga mapiko. Ug sugod ugmang adlawa ug sa Myerkoles ug Lunes nga tanan siya ato na nga makauban aron mopaambit sa iyang mga panahom sa mga nag-unang isyu ug panghitabo ning katilingban nga atong gipuy-an.

Siya walay lain kondili ang tingog luyo sa programang 'Morning na Cebu" matag alas singko nga mulungtad og usa ka oras samtang ang susamang tingog mabati na usab og balik matag alas sais sa gabii sa programang "Saksi" sa gipaminaw nga estasyon sa radyo nga dySS. Siya si Gerry Auxilio, graduado sa abogasya, professor sa political science sa Southwestern University ug labaw sa tanan magsisibya. Ug sugod sa Huwebes dugang titulo na usab ang ipatong sa iyang ulo ug kana walay lain kondili ang pagka kolumnista dinhi niining inyong kinaham nga mantalaan.

"Ambot lang." Kini maoy titulo sa iyang column nga mapatik sa opinion section dinhi sa Banat News. Ang pag-abot ni Gerry sa ganghaan sa Banat sama og gibadlis nang daan sa kapalaran. Ang makapahimoot lang mao nga niadtong nakalabay nga tuig nagtinguha na diay siya nga mahimong maglilindog sa Banat News ug gani miduso gyud siya sa iyang application letter. Apan niadtong panahona dili pa andam ang management nga modawat og bag-ong mga magsusulat. Gihikling una niya ang maong tinguha ug nagpadayon siya isip magtutudlo ingon man magsisibya. Nakalimtan na ang iyang application apan ning bag-o lang nahukman nga palig-onon pa ang opinion section ning mantalaan ug wala damha nga usa ang ngalan ni Gerry sa mga personalidad nga misantop sa hunahuna sa management. Hinungdan nga usa lang ka text ug diretsong gihangop ni Gerry ang kahigayonan.

Si 35-anyos nga si Super Gerry lumad nga taga Bien Unido Bohol. Tuig 1998 sa dihang una siyang misulod isip magsisibya sa radyo samtang nagpaabot siya sa resulta sa bar exam. Ang Bombo Radyo-Cebu maoy niabli sa pultahan alang kaniya aron mahisakop sa kalibutan sa panibya. Dili pa panahon ni Gerry sanglit wala siya makapasar sa bar exam hinungdan nga nagpabilin siya sa Bombo Radyo tungod kay matud pa niya nakabaton na siya og gugma sa maong propesyon.

Duha ka tuig na ang milabay sa dihang nanamilit si Gerry sa Bombo human siya mihukom nga magpapili isip konsehal sa lungsod sa Bien Unido. Apan naparot si Gerry sa nahisgutang bugnong lugaynon hinungdan nga mibalik siya sa Sugbu isip magtutudlo sa SWU. Niadtong nakadesisyon siya nga mangandam alang na usab sa bar exam miabot ang tanyag aron mahibalik siya sa kahanginan sa panibya. Ang tri-media personality sa Sugbu Super Bobby Nalzaro maoy mihatag kaniya sa dili mabalibaran nga kahigayonan. Hinungdan nga karon inyo na usab siya nga nakauban matag adlaw nga nagbugtaw sa kamatuoran, nanalipod sa mga dinaugdaug ug nilupigan ug nakiggakos sa propesyon nga iyang nang gihigugma kaniadto pa.

Ug kon inyo siya nga gikahinaman sa kahanginan tungod sa iyang kaisog o dili ba inyong gikasilagan o gipanghimaraot tungod kay kamo naligsan sa iyang mga panahom pwes pahiluna kay ang susamang pagbati inyo nang matagamtaman pinaagi sa pagpakli sa mga pahina ning Banat News. "Ambot lang," dili ba mo madutlan.