Ilusad na

Sa katapusang adlaw sa buwan sa Marso, maoy pormal nga launching sa mga bag-ong programa sa Cebu Catholic Television Network kon CCTN. Kining maong mga programa upat ka teleseries, usa ka talk show, usa ka musical program ug pagkaplag sa mga bag-ong mga artista sa lalawigan sa Sugbo pinaagi sa usa ka laing matang sa bangga sa awitay aron kining makaplagang mga bag-ong nawong mao unyay mahimong mga artista sa pipila ka mga teleseries. Pipila sa mga teleseries gisulat nila ni Stella Palomo M. (usa ka light drama), Ricardo Feliciano (usa ka heavy drama), Joey Sumako (action), ug Pepe Tarriman (usa ka action comedy nga gisambugan og gamay nga drama) Ang talk show nga isal-ot sa programa ni Sam Costanilla, maghisgot og showbiz ug intriga sa katilingban, nag-ulohan og, "Ay Kinabuhi!" Ang pagkaplag sa mga bag-ong artista dumalahon ni kanhi "Tawag Ng Tanghalan" champion, Novo Bono, Jr. gitawag og 'Search For Southern Star". Hinoon sa wa pa ang pormal nga launching, sugdan na ang mga bag-ong programa karong Marso 12 samtang ang "Search For Southern Star" sugdan pa karong Marso 21 diha sa dakbayan sa Talisay.