Pelikula ni Juday ug Ryan sugdan na

Dili pa madawat sa mga fans nila ni Mark Herras ug Jennylyn Mercado nga magbaton sila og lain-lain nga screen partner.

Kini tungod kay nabantayan nga dili gyud kaayo taas ang rating sa ilang mga shows diin lain lain ang ilang loveteam sama nalang sa Hongkong Flight 143 diin partner ni Mark si Pauleen Luna.

Ang Love to love season 9 diin partner ni Jennylyn si Jake Cuenca matud pa taas og rating apan layo ra kon itandi sa positibo kaayo nga reaksyon sa mga fans sa dihang ang duha pa nga Starstruck Ultimate Survivors ang nag-uban sa mao gihapon nga show.

Ang tsika sa PangMasa mao nga bad shot si Pauleen ngadto sa mga fans sa kanhi managhigugmaay sanglit sa dihang gigama pa ang maong soap didto sa Hongkong mao usab kadto ang panahon nga nagbuwag si Jennylyn ug Mark busa nahug og si Pauleen ang kontrabida.

* * *

Gidungog nga dunay duha ka mga iladong talents sa ABS-CBN ang magdungan og layat bisan unsang orasa aron magdungan og tekang ngadto sa nataran sa GMA-7.

Matud pa sa tinubdan sa PangMasa nga ang usa dugay na nakigsabot sa GMA network ug matud pa plantsado na ang tanang proyekto nga iyang buhaton isip bag-o nga Kapuso.

Ang ikaduha nga talent bag-o lang nakigsabot sa GMA-Artist Center apan ang dugang taho sa PangMasa nga ang duruha humana nanamilit ug nagpasalamat sa ilang mother studio.

Kung kinsa ning maong mga talents angayan ninyong atangan dinhi sa Banat Hugyaw sanglit ato nang nganlan karong pipila ka adlaw.

* * *

Mahimong super busy na karong musunod nga mga adlaw si direk Joey Reyes sanglit wala nay babag ang iyang gam-on nga pelikula ubos sa Seiko Films nga dunay tentative title nga 'Happily Ever After."

Pambato sa maong pelikula mao ang gilambigit ngadto sa usag usa isip managhinigugmaay nga sila si Diana Zubiri ug Alfred Vargas diin kauban nila sila si Cherry Pie Picache ug Joey Marquez.

Si direk Joey usab maoy mogunit sa unang pelikula nga gam-on sa tinuod nga mag-sweethearts nga sila si Judy Ann Santos ug Ryan Agoncillo ubos sa Canary Films.

Giuluhan og "Kasal, Kasalo, Kasali," gikatakda nga magsugod ang shooting sa duruha karong March 17 sa dili pa mulupad si Juday alang sa iyang mga shows abroad.

* * *

Mitumaw karon ang taho nga gikatakda na nga magpakasal si Hans Montenegro ngadto sa iyang non-showbiz girlfriend gani kanunay na nga makita ang duruha nga mohatag og testimonial sa mga panagtigom diha sa ilang Christian community.

Buot masayran sa mga himantayon kon unsay reaksyon ni Maritoni Fernandez sanglit ang naulahi maoy mipasiatab kaniadto nga magpakasal sila ni Hans sa simbahan sanglit hugot ang ilang gugma ngadto sa usag usa.

Apan wala magdugay nagkabuwag ra usab sila.

Si Hans una na nga naminyo apan nakig-buwag sa beauty queen model nga si Cara Subijano.