Dakong lakang paghangop sa pangandoy

Kinsay motoo nga ang Fil-American singer nga si Kris Lawrence nahadlok diay sa mga Sugbuanon? Well, mao kana ang gibutyag ni KL sa dihang nahinabi sa Banat Hugyaw didto sa backstage sa bag-o pa lang gipahigayong Close-up Lovapalooza Cebu 2006, diin usa siya sa mga performers. "Kinda (kind of) scared," pong pa niya sa dihang hapit na tawga ang iyang pangan aron mopasundayag sa entablado.

Matud pa niya basin boo-han siya sa mga Sugbuanon, kinsa wala makauyon sa desisyon sa mga hurado sa Search for a Star in a Million diin napildi ang atong manok nga si Jimmy Marquez. "They're gonna say boo when I get to the stage."

Apan sa dihang mitongtong na siya sa stage gisugat siya og makabungog nga pakpak susama ka init sa pagdawat nga gipahamtang sa mga Sugbuanon ngadto usa kang Jimmy nga unang mipasundayag kang KL. "They have been very warm," nagngisi na si KL sa dihang mikaunaug na siya sa entablado.

Dili kapugngan nga magbaton og kahadlok o kabalaka ang nahisgutan nga SIAM grand winner ngadto sa mga Sugbuanon. Kini tungod kay tataw man kaayo nga wala kita ganahi niya nga maoy modaug. Ang bagang duot sa mga Sugbuanon kanunay nga nagpalanog nga si Jimmy gayud ang haom sa maong titulo.

Giangkon ni KL nga nakabasa siya sa mga write ups nga niabot didto sa kauluhan nga mga sinuwat sa mga Sugbuanong maglilindog nga namahayag nga "not good looking" siya ug di siya haom sa titulo.

"Everybody has his own opinion. I did my part," matud pa ni Kris kabahin sa mga intriga kaniya.

Giasoy niya nga wala gyud siya magdahom nga siya'y modaug gani dihang sila nalang ni Tata Villaruel ang nahabilin sa stage nagtoo siya nga ang pambato sa Ilo-ilo ang makaangkon sa korona. Nakurat nalang siya sa dihang gitawag ang iyang pangan. "Nanginginig ang knees ko,".

African-American ang inahan ni KL samtang Pinoy usab ang iyang amahan. Sukad pa sa bata siya hilig na gyud niya ang pagkanta. Nagdako siya sa Los Angeles ug nag-major og music sa California State University -Northridge. Si Prince of R&B Jay-R maoy iyang suod nga higala.

Alegre ang sinugdanan sa ilang panaghigala sanglit kanhi sila magka-atbang sa high school kon kanta na ang hisgutan. Ug sa dihang mihupas na ang ilang rivalry nagmugma sila'g all-male R&B vocal group.

Sa pagligid sa mga tuig nahimong sikat nga R&B singer si Jay-R dinhi sa nasud. Niadtong mga panahona kuyog-kuyog si KL sa nahisgutang R&B Prince. Last year apil siya sa mga guest performers ni Jay-R sa iyang show atol sa Lovapalooza 2005.

Sa dihang nagsugod na ang audition sa SIAM namasin si KL isip unang lakang paingon sa katumanan sa iyang pangandoy nga mamahimong sikat nga singer. Ug tuod man "the rest is history." Karong umaabot nga Abril i-release na ni Kris ang iyang first solo album nga naglakip og duha ka Tagalog songs, ug laing duha nga siya maoy mitagik ug migama.

Matud pa niya, dugay na siya nga wala makauli didto sa America apan wala kini niya igsapayan sanglit mas gaan ang iyang pagbati kon ania siya sa Pilipinas ilabi nga dinhi misubang ang iyang bitoon paingon na ngadto sa kabantogan.