Sa pangidaron nga 16-anyos wala lang damha ni Nicole nga mapadpad siya sa ganghaan sa Sparkle Modeling Agency. First year sa kursong Hotel and Restaurant Management sa Cebu State College of Science and Technology (CSCST) giaghat sa usa ka classmate aron suwayan ang pagmodelo.
Dunay gitas-on nga 5'4 ug morena si Nicole. Ang unang tilaw ni Nicole sa rampa mao ang pagsalmot niya sa Miss UN sa Don Vicente Rama Memorial High School sa tuig 2003 diin nakadaog siya isip best in gown. Pagkasunod tuig nakab-ot niya ang iyang unang kadaugan sa indigay sa kaanyag isip Miss Intramurals sa maong tunghaaan.
Adunay dakong pagsalig sa iyang kaugalingon si Nicole sanglit dili siya bation og kasina sa ubang mga maanyag usab nga mga modelo nga iyang katrabaho. Si Nicole naggikan sa kabus nga pamilya diha sa Barangay Basak, Pardo niining dakbayan. Siya maoy kamanghuran sa lima ka mga magsuon ug bugtong nga anak nga babaye. Ang amahan ni Nicole usa ka piano technician samtang ang iyang inahan walay trabaho ug maoy nag-atiman kanila.
Gawas sa pagmodelo pangandoy ni Nicole nga makatapos sa iyang pagtuon tungod kay buot niyang makatrabaho sa mga inilang hotel. Bugtong damgo mao nga mahaw-as gikan sa kalisud ang iyang mga ginikanan.
Matud ni Nicole nga "exposure" ug ang iyang pagkahilig sa "fashion" maoy mga rason sa iyang pagpanimpad isip modelo. Mulugwa usab siya sa mga bikini open contests aron mapun-an pa ang pagsalig niya sa iyang kaugalingon.
Tungod sa pangandoy nga makahuman sa iyang pagtuon nakakat-on si Nicole og "time management" sanglit dili siya gustong maapektohan ang iyang oras sa pagtuon sa iyang pagmodelo.