Away ni Alex ug Booba ginegosyo

Gisapot ang beauty sa beterana nga kolumnista sa PangMasa ug gamhanan nga talent manager nga si Manay Lolit Solis human niya masuta nga gihimo na nga negosyo nila ni Ethel Booba ug Alex Crisano ang ilang panagbingkil matag karon ug unya.

Matud ni Lolit nga dili lang diay siya ang nakabantay kondili daghan pa kalabot sa pagpangayo og talent fee sa duruha sa higayon nga dunay buot mo-interview nila og live o mo-pa guest nila sa mga tv shows aron tukion ang ilang away-amigo nga relasyon.

Miingon si Lolit nga dili dautan nga mangayo og honorarium isip bayad sa guesting apan matud pa niya dili maayo nga dunganon nila ang live appearance sa duha ka rival nga shows sama sa Startalk sa GMA-7 ug ETK sa ABS-CBN.

Gibutyag ni Lolit nga ang nakapait mao nga lakip na ang mga kabanay ni Ethel nga nag-apil-apil sa kagubot o nisakay sa isyu mangayo na usab og bayad.

" Mabuti sana kung talagang bago ang mga isyu na kinasasangkutan nila.Eh kaso, 'yun at yon din.Walang bago.Luma! Kumbaga sa ibang artista, laos na ang kanilang mga isyu na ipino-promote!" pong pa ni Lolit.

* * *

Gidungog nga ang ABS-CBN maoy nagbuot aron ibalhin ang venue sa kasal nila ni Aiko ug Martin Jickain niadtong Huwebes hinungdan nga dunay mga dinapit unta nga mga bisita ang wala gyud makatambong.

Nasayran nga ang original nga venue mao ang Blue Gardens apan nabalhin kini sa Fernwood Gardens sa Quezon City sanglit gamay ra kaayo ang nahauna nga napili nga lugar.

Buot ang ABS-CBN nga dako ang venue aron dili maguot ang palibot ilabi na nga duna silay exclusive coverage sa maong kasal diin ang ubang bahin niini gipasalida na sa The Buzz niadtong Domingo.

Hinoon nakasabot ra ang ubang mga dinapit nga bisita ug sila mismo gikatahong nakauyon ra sa bag-o nga venue sanglit luag ug hamugaway kini.

* * *

Dili tinood nga pulihan ni Randy Santiago si Willie Revillame isip host sa bag-ong noontime show nga ihulip sa Wowowee.

Kini maoy gibutyag sa usa ka source nga nahinabi sa PangMasa kinsa midugang sa pag-ingon nga dunay concept ang bag-ong show ug bisan unsang orasa sugdan na ang rehearsal alang niini. Hinoon wala pa matino sa source kon unsay title sa bag-o nga show ug kon kanus-a kini sugdan pagpasalida sanglit wala pay hukom nga gipakanaug ang mga kadagkuan sa Kapamilya network.

Giklaro sa source nga pulihan ni Randy si Willie isip host alang sa usa ka show nga gikatakdang ipahigayon didto sa Milan Italy sunod buwan sanglit dili na mulugwa si Willie didto.

Matud sa source nga hangtud karon padayon pa gihapon nga nakig tambayayong si Willie sa mga pamilya sa mga namatay atol sa stampede sa Ultra niadtong Pebrero 4.