Claudine mobalhin sa GMA-7

Si Claudine Barreto ang gipasabot sa mga blind item few days ago nga gikatakdang molayat paingon sa nataran sa Kapuso sanglit napupos na ang kontrata niini ubos sa Star Magic.

Suma pa sa PangMasa nga wala nay proyekto si Claudine ubos sa network samtang per project nalang siya sa Star Cinema busa mahimo na siya nga molayas bisan unsang orasa.

Apan mga insiders naglibog asa nga show ibutang si Claudine kon ugaling mobalhin siya sa karibal nga estasyon tungod kay matud pa walay laing angayan nga ipares kaniya.

Nan matud pa nga hayan comedy ang unang show ni Claudine sa Kapuso kay si Raymart Santiago nga iyang uyab ug regular sa Lagot Ka Isusumbong Kita mao lay haom ipares niya.

Nasayran usab nga wala nay manager si Claudine karon ug siya na mismo ang makig negosasyon kon dunay mga offers ngadto niya.

Apan mga insiders sa GMA-7 hugot nga namalibad sa maong taho sanglit wala gyud kini kamatuoran busa hayan intriga lang.

Sa pagkakaron busy si Claudine sa nagpadayon nga shooting sa pelikulang giulohan og 'Sukob" diin kauban niya si Kris Aquino.

Gawas pa niana wala na usay puas ang iyang preparasyon alang sa ilang umaabot nga kasal ni Raymart karong Marso 27.

* * *

Gipaabot nga magbaha na usab ang mga taga showbiz atol sa birthday party ni Senador Jinggoy Estrada karong adlawa.

Nagdumili si Manay Lolit Solis pagbutyag asa ang party tungod kay matud pa niya sigurado nga magbaha gyud unya ang mga taga-showbiz.

Pero sigurado siya nga dunay party ang senador tungod kay gimahal niini ang mga artista ug nakasiguro usab siya nga mas daghan ang mga gikan sa showbiz kaysa mga politiko.

Matud niya nga mas komportable si Jinggoy nga makig-uban sa iyang mga higala gikan sa industriya tungod kay tinood kini nga mga tawo kon itandi sa mga naggikan sa gubot usab nga kalibutan sa politika.