Sa subling pagsubang sa bitoon

Tuig 2004 sa dihang migalak og maayo ang iyang bitoon. Ang maong kadaugan dili lang iyang garbo apan lakip na sa tibook Sugbu. Walay pangutana, walay pagsupak ug walay kahibulong nga nabati human sa maong kadaugan. Bugtong lanog lang nga pag-abiba ang mipatigbabaw sanglit siya na gayud ang "Born diva" sa nasud ug wala nay lain pa. Siya si Raki Vega, sugbuanon ug mapasigarbohon sa iyang kagikan kinsa mas naila isip Rochelle ngadto sa iyang mga higala.

Matag Sabado atong ginuntan ang iyang pagpanlimbasog pag-angkon sa nahisgutang titulo. Mga pag-ampo ug pangaliya gibuhian ta sa pangandoy nga siya gayud ang modaug ug wala gayud kita mapakyas. Ang maong lahi nga bangga sa awit gipangandoy nato nga maoy mohatag og dalan sa lain na usab nga paisana sa natad sa musika. Apan daklit lang ang kalipay nga atong gibati sanglit ang mga saad nahanaw daw aso ug nangalaya daw sagbot hangtud na nga nalubong sa kalimot.

Isip "Born diva" sa ABS-CBN si Raki gipasaligan og recording album, soap opera, guesting sa nagkadaiyang mga shows wala pay labot sa saad nga siya maoy pakantahon sa theme songs sa mga umaabot nga teleserye sa nahisgutang network. Walay bisan usa nga natuman. Ni anino lang walay recording album nga namugna. Uwahi na sa dihang natino ni Raki nga ang kontrata nga iyang gipirmahan ubos sa Star Records wala magpasabot og solo album. Bugtong mensahe niining maong kontrata mao nga mahimo siyang hatagan og project kauban sa lain pang mga recording stars sa maong kompaniya.

Ning bag-o lang giklaro ni Raki nga laing rason nganong napakgang ang pagsubang sa iyang bitoon sa nataran sa ABS-CBN mao nga naglisud ang management unsaon siya pag-package. " Naglisud gyud sila sa packaging kay dili mo-click ang broadway songs," asoy pa ni Raki ngadto sa mga sakop sa Cebu press niadtong nakalabay nga semana.

Sanglit mingaw pa kaysa mabugnaw nga kadlawon ang dagan sa iyang career mihukom si Raki nga molayat na gikan sa nataran sa Kapamilya aron magbinugtong nga manimpad alang sa kalambuan sa iyang pagka-mang-aawit. Last year pa siya mibiya.Hinoon dunay mga negosasyon karon aron mopirma siya og management contract ubos sa "Stages" ang kompaniya nga maoy nagduma sa career karon ni Asia's Pop Idol Christian Bautista. "It's a wise move daw pero mag sige pa gihapon ko og communicate sa ilaha (Star Records) for guestings every now and then. Maayo raman among relasyon. I did not burn bridges there."

Bisan pa man sa mga napakyas nga saad malipayon ra gihapon si Raki sa maong kasinatian tungod kay didto niya nasuta asa ug unsa gayud ang buot niya nga mahitabo. Sa maong mga panahon nasabtan ni Raki nga mas dako ang iyang paghigugma sa entablado ug dinhi niining maong kalibutan siya buot nga magmasidlakon. " I love plays. Lahi gyud ang fulfillment."

Pwes kon nahigugma siya sa entablado matawag nga pareho ra ang ilang pagbati o "the feeling is mutual." Kini tungod kay niadtong nakalabay usab nga tuig subling napamatud-an ni Raki ngadto sa kadaghanan ang iyang bulawanong talento sa pagkanta sanglit gikagubtan, gidayeg ug gipangita ang iyang performance sa duwa sa entablado- ang "Once on this island." Mga beterano sa maong kalibutan ang gikauban ni Raki sa maong duwa apan wala siya magpapire ug magpa-alkanse gumikan kay ang matag niya lugwa gikahinaman kaayo sa publiko. Gani duna nay mga panagna nga siya na ang sumusunod sa mga lakang sa iyang idolo nga si Lea Salonga.

Dinhi sa entablado sa teatro gilauman ug gipaabot nga subling mosubang ang masidlakon nga bitoon ni Raki. Wala siyay pagmahay ug pangpangluod nga gibati tungod kay matud pa niya dunay rason ang tanan nga nahitabo sa iyang career. "I know God has a plan," pong pa ni Raki. Tungod niini padayon siyang misalmot og mga acting workshops sa ingon mas maugmad pa ang iyang tinaguan nga potensyal. Sunod semana gikatakda na nga moatubang si Raki sa lain na usab nga duwa sa teatro nga giuluhan og " Bahay ni Juan" diin mga beterano na usab ang iyang makauban.

Mintras umaabot pa lang kini, wala kalimti ni Raki ang iyang mga paisano sanglit karong alas otso sa gabii paambitan niya ang iyang talento agig pasalamat pinaagi sa "Raki Celebrates Love" nga maoy labing dako niya nga concert sukad siya nahimong "Born Diva."Gimugna pinaagi sa paningkamot sa Asian Academy of Music, makauban ni Raki ang Peace Philharmonic Orchestra ug ang bata nga champion sa Cebu Pop Music Festival nga si Grant Dosdos. Excited si Raki tungod kay kon walay mga kakulian ikauban ug mamahimo niyang espesyal nga mga bisita karong gabii ang mga bata nga ubos sa pag-amoma sa Cebu City Task Force on Street Children. Matud niya dako niyang kalipay nga sa gamay niyang paagi makahatag siya og inspirasyon niining maong mga bata pinaagi sa iyang mga awit aron ugma damlag sila na usab ang mohangop sa pagsubang sa ilang mga bitoon ngadto sa mahayag nga kaugmaon.