Tibook nga tingog alang sa kalampusan

Daghan na'ng mga binuhat ang namasin pagsubay sa dalan padulong sa kalampusan apan pipila ra kanila ang nagmalampuson. Sila mao lang kadtong nangandoy nga wala magsapayan sa mga sakripisyo nga ilang naagian hinunua mas nagkugi pa sila pagkab-ot sa ilang damgo. Usa kanila mao ang ilado na nga TV reporter nga si Jun Veliganio.

Motuo ba kamo nga kining respetadong tigbalita sa Balitang Bisdak kaniadto igo ra intawon nga manungkab og bahaw sa higayon nga mahikatulog na ang iyang mga boardmates aron matambalan ang iyang kagutom? Kini ang kamatuoran nga nakapabasa sa iyang duha ka mga mata sa dihang nahinabi sa Banat Hugyaw didto sa GMA-7 complex sa Nivel Hills niadtong nakalabay nga semana.

Pinugngan ang mga luha samtang gilab-as niya ang iyang mapait nga kagahapon gisaysay ni Jun V. ang iyang mga kaagi sa kolehiyo palang siya. Matud pa niya kay lagi kabus man ang iyang pamilya napugos intawon siya'g hangyo sa iyang mga kauban sa Cebu State College (karon Cebu Normal University) nga papuy-on siya sa ilang boarding house nga libre ug isip bayad siya nalay manglimpyo sa balay. Lapoy ang lawas ug nagkutoy ang tiyan sa gabii siya manglimpyo ug mobanat na usab siya pag-eskuyla pagka buntag hinungdan nga kanunay siya nga magduka sa klase o mahikatulog ba hinoon.

Sa isla sa Bantayan natawo ug nagdako si Jun V. Ang iyang amahan mananagat diin ang kita dili halos mapaigo nilang tanan. Si Jun ika-onse sa 14 ka managsuon, diin lima niini mipanaw na sa laing kalibutan. Gumikan sa kalisod sa ilang kahimtang napugos ang atong bida sa paghunong sa pagtungha sa dihang mag-high school na siya.

Sa pangidaron nga kinse anyos diha sa Carbon Public Market nanimpad si Jun V diin giahat niya ang iyang linghod nga lawas sa pangalsa og bug-at ilabi na mga baboy aron mokita bisan gamay lang sa ingon makatigom siya og ipada sa iyang nag-ilaid nga pamilya didto sa isla. Gibuhat niya kini sulod sa pito ka tuig. Niadtong mga panahona gihikling una niya ang iyang pangandoy nga makahuman sa pagtuon. Gani miabot man gyud ang higayon nga nawad-an na siya og interes nga mobalik sa eskuylahan.

Apan gumikan lagi kay adlaw gabii nga walay pahuway ug kayod ang iyang lawas miabot ang panahon nga gipaninglan gyud siya sa iyang kaugalingon. Pasmo ug bughat ang iyang naangkon busa mibalik siya sa isla diin didto niya gisugdan og gansilyo pagbalik ang iyang mga damgo sa kinabuhi.

"Nahunahuna nako nga kon mag-standby rako didto walay mahitabo nako mahimo rasad ko nga mananagat. Mao to nga nibalik ko og eskuyla bisag dako nakog edad."

Desinueve anyos si Jun nahimo siyang konsehal sa ilang barangay sa Baigan ug 21 anyos na siya dihang gipadayon niya ang iyang pagtoon. Ug sa dihang nigraduwar siya sa high school nisugal siya pag-ari sa syudad aron matuman iyang pangandoy nga makahuman og usa ka kurso sa ingon makab-ot niya ang gitinguhang tingusbawan alang sa iyang pamilya.

Pagpanukad pa lang niya aron atubangon ang lain na usab nga pagsuway sa kolehiyo naglisud na siya daan. Ultimo pag-ari palang niya naglisud na siya kay wala siyay ipamelete sa barko. Nagpabaga siya sa iyang nawong paghangyo sa mga tripulante sa barko nga dili nalang siya pabayron og P80 isip plete.

"Pinakalisud ang unang duha ka tuig sa college," matud pa ni Jun, samtang gisaysay niya ang mga higayon nga sag-uhon nalang niya ang panihapon kay wala siya'y kwarta. Swerte nalang kung naay daghang kuha iyang amahan diin padad-an siya niini sa boarding house og isda nga binuwad nga saw-an usab nila sa iyang mga kauban sa balay.

Kurso nga Bachelor of Science in Mathematics ang iyang gitun-an diin kabahin niini ang radio internship sanglit kanhi nasakop ang maong kurso sa College of Arts and Sciences. Kini maoy hinungdan nganong napadpad siya sa pultahan sa kanhi sikat nga estayon sa radyo- ang dyRC. Tuig kadto nga 1995 diin sa ikaduhang adlaw pa lang sa iyang internship gikuha na dayon siya nga tigbalita sanglit tibook ang iyang tingog ug makamao na usab siya nga mohan-ay og balita. Ang maong kahibaw naugmad niya sa dihang high school pa siya diin kanunay na siya nga mag-announcer sa mga bayle sa nagkadaiyang dapit sa Bantayan. Tungod sa iyang trabaho medyo ni-arang arang na ang iyang kahimtang isip estudyante.

Tuig 1999 sa dihang gipadayon si Jun V. sa ganghaan sa Kapuso human manirado ang DyRC. Karon matawag na nga malampuson ang atong bida sa natad sa panibya diin tanang duguong hitabo iya nang nahibalag nga maoy nagpahimo kaniya nga lig-on ug sinaligan nga tigbalita. Gani siya naman maoy ihulip isip anchor sa 'Balitang Bisdak" kon ugaling mobakasyon ang tri-media personality nga si Bobby Nalzaro.

"Mapasalamaton ko sa akong naabtan karon," matud pa ni Jun human mipahiyom.

Sa pangidaron nga 37-anyos duna nay duha ka mga anak si Jun V. diin bugtong nalang niyang tinguha mao nga makahuman ang iyang mga cheketing og kurso sa ingon dili nila matagamtam ang iyang mapait nga kasinatian. Isip mediaman, nangandoy usab siya nga moabot ang adlaw nga makasuwat siya sa usa ka mantalaan diin mapaubsanon niyang giangkon nga naningkamot pa siya pagkat-on sa lengguwahing engles.

Daghan pa og sagubangon si Jun V. nga mga pagsuway una niya makab-ot ang iyang gipangandoy alang sa iyang pamilya. Apan dinuyugan sa panalangin sa Dios ug sa iyang paningkamot nasayod siya nga moabot ra gyud unya ang adlaw nga dugay na niyang gipaabot.