Ila-ilaha si Kim Sam Soon

Sugod karong Lunes duna na usay kabuangan ang mga mahiligon sa Asian nobela sanglit mo-hugyaw na sa atong mga imahinasyon ang labing sikat nga soap sa Korea sa nakalabay nga tuig.

Nag-uluhan og My name is Kim Sam Soon, ang nahisgutan nga soap maoy numero uno didto sa Korea sa 2005 diin nakaangkon kini og 50% viewership didto sa maong nasud.

Kon nalingaw ug natandog mo sa Jewel in the Palace nga maoy numero uno nga soap sa Korea sa tuig 2004 labaw pa unya ang inyong katagbawan nga matagamtam pinaagi sa 'My name is Kim Sam Soon.

Kini magsugod dayon human sa Extra Challenge sa primetime block sa GMA-7 isip hulip sa "Sugo" nga natapos na kagabii.

Ang maong soap istorya ni Kim Sam Soon kinsa dili guapa, dili nindot og lawas ug labaw sa tanan dili datu apan nakahimong gikabuangan sa mga kalalakihan sa iyang panahon.

Bulgar siya og baba, prangka, ordinaryo ug gani giisip nga "old maid" o nilapas na sa kalendaryo busa dili na haom nga hatagan og pagtagad apan nakahimo pag-angkon sa gugma sa usa ka datu ug guapo nga lalaki.

Ang papel ni Kim Sam Soon gihatagan og kinabuhi ni Kim Sun Ah kinsa nituyo gyud og patambok aron mahatagan og hustisya ang iyang papel.

Si Kim Sun Ah maoy giila nga "Bridget Jones" sa Korea kinsa dunay ngilngig nga imahinasyon sama kang Ally Mcbeal.

Gihangop ang maong soap didto sa Korea diin daghan na ang nisunod sa character nga gipauso ni Kim Sam didto ilabi na sa mga babaye nga nagpangidaron og 20 ngadto sa 30 anyos.

Gumikan sa maong soap nakabaton og dugang pagsalig sa ilang kaugalingon ang mga kababay-an sa Korea ug ilang nasabtan nga dili kinahanglan nga datu, guapa ug nindot og lawas ang usa ka babaye aron higugmaon tungod kay ang gikinahanglan lang nga magpakatinood sila sa ilang mga kaugalingon.

Ang leading man ni Kim mao si Cyrus (Hyun Bin) kinsa tag-iya og usa ka restaurant og mihangyo sa atong bida nga magpaka-aron ingnon sila nga dunay relasyon.

Kung giunsa nga nagkatagbo ang ilang duha ka dalan ug nahimo silang tinood nga manag-uyab maoy angayan ninyong atangan matag gabii human sa Extra Challenge diin ang theme song niini nga "Maybe It's You" gikanta ni Jolina Magdangal.

Gawas niini angayan usab nga atangan gyud ninyo ang labing bag-o nga Korean novela tungod kay makadaug kamo og premyo pinaagi lang sa pag-text og KSS ON to 4627 for Smart and 2364 for Globe, Sun, and Touch Mobile subscribers.