Christopher singer na

Duna nay album ang premyadong aktor nga si Christopher de Leon nga bag-o pa lang gyud niya nga gi-release ug dunay uluhan 'Mga Awit Pelikula ni Christopher de Leon" ubos sa Viva Records.

Lakip sa mga kanta mao ang Bituing Walang Ningning nga duet nila ni megastar Sharon Cuneta ug ang Sanay Maghintay ang Walang Hanggan uban usab si Asia songbird Regine Velasquez.

Thankful si Christopher ngadto sa duha ka mga dagkong bitoon sa industriya tungod kay matud pa niya wala kini maghinakog sa ilang mga tingog bisan og pahiyom ra ang iyang gibayad.

Sentimental usab si Christopher tungod kay giapil usab niya pagkanta ang "Iduyan Mo" nga maoy theme song sa iyang pelikula kaniadto nga "Aguila" kauban si Fernando Poe Jr. nga matud pa niya dili gyud malimtan tungod sa ka matinabangon niini.

Matud ni Christopher si FPJ maoy iyang ninong, suod nga amigo ug big brother kinsa wala magpanuko pagsuporta niya sa dihang nagsugod pa siya kaniadto isip artista.

Three album contract ang gipirmahan ni Christopher ubos sa Viva.

* * *

Dili manginlabot si Ara Mina sa love life sa iyang manghod nga si Christine Reyes kinsa gikataho nga maoy gipangulitawhan ni Governor Mark Lapid karong mga panahona.

Matud ni Ara nga dili una siya manghilabot kang Christine sanglit bag-o pa sila nga nagka-amiga og balik busa dili siya buot nga magka diperensyahanay na usab sila.

Gawas pa gikan sa maayo nga pamilya si Mark busa wala siyay angayan nga kabalak-an gawas pa nga paminaw niya maayo kini nga tawo.

Gipasabot ni Ara nga kaniadto nabalaka lang siya nga magpatabang nalang niya ang iyang manghod human kini pamabdose sa uyab busa nabalaka siya kaayo.

Kahinumduman nga labihan nakasupak ni Ara sa pagpanguyab ni Kempee de Leon kang Christine tungod kay matud pa niya labihan pa ka bata ni Christine sa pangidaron nga 16 anyos kon uyabon ni Kempee nga 34 anyos na niadtong panahona.

* * *

Walay kasudlan sa kalipay si Robin Padilla human siya maoy nahimong best actor sa tinuig nga selebrasyon sa "Akademisyan ng mga Aninong Gumagalaw" diin gipilde niya sila si Aga Muchlach ug Piolo Pascual.

Ang pelikulang 'La Visa Loca" maoy naghatag kang Robin sa labing una niya nga best actor trophy diin lakip sa iyang gikatige mao sila si Aga (Dubai), Piolo (Dreamboy), Ricky Davao (Pusang Gala), Nathan Lopez (Ang Pagdadalaga ni Maximo Oliveros) ug Marvin Agustin (Kutob).

Samtang best actress usab si Zsazsa Padilla (Ako Legal Wife) diin iyang gipilde sila si Claudine Barretto (Dubai), Cherrie Pie Picache (Bikini Open) ug Bea Alonzo (Dreamboy).

Speechless si Robin sa pagkakaron gumikan sa iyang nadawat nga award tungod kay wala siya mag-expect sa maong pasidungog hinungdan nga daghan na ang naghinamhinam nga mabati ang iyang pakigpong atol na unya sa testimonial dinner karong Marso 6.

Ang "La Visa Loca" maoy unang pelikula nga gi-produce ni megastar Sharon Cuneta ubos sa pakigtambayayong sa Unitel Pictures.