Ike Durano niretiro

Luyo sa mga hagawhaw kalabot sa tinuod nga hinungdan nganong miluwat siya isip station manager sa Bombo Radyo-Cebu, giklaro ni Ike Durano nga ang ka-busy na niya sa iyang pagtuon maoy bug-at nga rason nganong nipahawa una siya.

Apan dali niyang gidugang nga wala kini magpasabot nga muhonong na usab siya sa iyang kawsa pagtugkad sa kamatuoran ug ang paggukod sa mga tampalasan sa kagamhanan nga padayong nag-ut-ot sa kinabag-ang duot sa masa.

Ang maong katin-awan giluwatan ni Ike sanglit namantala dinhi sa Banat Hugyaw ning bag-o lang nga bisan pa man sa mga hulga nga iyang nadawat matag karon ug unya gikan sa mga tawo nga naligsan sa iyang mga komentaryo dili gyud siya molurang sa iyang nasugdan na nga kawsa. Daghan ang nahinugon nga mga tigpaminaw ni Ike sa maong desisyon sanglit kalit kaayo ang maong lakang.

Sa pakighinabi niya sa Banat Hugyaw niadtong nakalabay nga semana iyang gitataw nga tungod sa ka hectic sa schedule sa iyang pagtuon sa abogasya napugos siya sa pagluwat sa iyang katungdanan. Iyang giangkon nga siya mismo gibati og kahaw-ang sa iyang pagtalikod una sa media sa pagkakaron. Apan kon duna may nalipay sa maong hukom sila walay laing kondili ang iyang mga ginikanan nga sukad pa sa sinugdanan supak nang daan sa iyang gipili nga propesyon.

Matud ni Ike nga wala siya'y nahimong pagkuwang sa iyang pagserbisyo sa Bombo Radyo diin ang tanan niyang gimbuhaton ubos sa maong estasyon giisip niya nga dakong hagit sa iyang katakus. Suma pa niya natunong lang nga dunay laing tawag sa kahigayonan nga angayan niyang tubagon.

Dungan niini iyang gisaad nga ang pagbiya niya sa Bombo Radyo wala magpasabot nga katapusan na sa iyang mga damgo ug tinguha nga mo-alagad sa kadaghanan. Matud niya sa pagligid unya sa mga adlaw mobalik ra usab siya aron mas makadalit og kaayohan ngadto sa tanan nga nagtuo ug nagsalig kaniya.