Kristine paborito ni Pacman

Dako og kahigayonan nga dunay mabanhaw nga pagbati unya tali kanila ni Jericho Rosales ug Kristine Hermosa sa higayon nga mahinayon silang duha sa pelikula sa kinabuhi ni Manny Pacquiao.

Sa nasayran si Echo ang modala sa papel sa boksidor samtang wala pa matino kinsa ang mamahimong leading lady isip asawa ni Pacman nga si Jinky.

Ang shortlist naglakip kanila ni Kristine ug laing duha ka mga talents sa Star Magic nga sila si Heart Evangelista ug Bea Alonzo.

Mga tinubdan namahayag nga dako gyud og tsansa nga si Kristine ang modala sa maong papel sanglit sa wala pa siya makampyon namahayag na si Manny kaniadto nga ang aktres maoy iyang gusto nga modala sa papel ni Jinky kon ugaling himoan og pelikula ang iyang kinabuhi.

Si Angel Locsin gyud unta ang gusto ni FLT film producer Rose Flaminiano nga maoy modala sa papel ni Jinky apan medyo hanap ang posibilidad sanglit hayan dili tugtan ang aktres sa Regal Films ug GMA Artist Center.

Si Pacman nga nibisita dinhi sa Sugbu kagahapon aron pag-renew sa iyang visa namahayag nga bisan kinsay mapili okay ra kaayo niya ug mag-agad lang siya sa gusto sa direktor ug producer.

Sigurado hinoon nga apil sa pelikula nga dunay working title nga "The Manny Pacquiao Story" mao si Rudy Fernandez isip trainer ni Pacman.

Si direk Joel Lamangan ang mogama sa maong pelikula diin matud pa nga kinahanglan nga adto sa Amerika himoon ang ubang esena aron mas matinud-anon kini nga tan-awon.

Ang shooting nga adto unya pagahimoon sa Las Vegas ug Los Angeles sugdan sa katapusang semana ning bulana.

Matud pa susama unya sa Million Dollar Baby ni Hillary Swank ug Cinderella Man ni Russel Crowe.

* * *

Samtang daw nabali ang kalibutan karon sa GMA-7 ug ABS-CBN kon ugaling tinood ang chika kalabot sa mga sikat nga Asian novela nga Lovers in Paris ug Endless Love.

Suma pa nga adto na sa GMA-7 ipasalida ang sequel sa Lovers in Paris nga dunay title nga 'Lovers in Praque" sanglit ang Kapuso network maoy nakapalit sa rights niini.

Samtang ang Endless Love kansang part one hangtud na sa part three nakita kaniadto sa GMA-7 adto na usab masalida sa ABS-CBN sanglit sila usab maoy nakakuha ug katungod alang sa maong pasundayag.

Sa laing bahin sugdan na sa QTV-27 karong lunes ang soap ni Vic Zhou nga a dunay uluhan nga Mars God diin kauban niya ang iyang real life girlfriend nga si Barbie Xu.

Matag alas siyete y media kini sa gabii maaninaw diin gipaabot nga kagubtan na usab kini sa mga fans sa F4 kaniadto sanglit ang maong soap maoy gipasidunggan isip Most Popular Soap sa 2005 atol sa Taiwan TV Award Golden Bell. - Ryan Mark