Rico Blanco nag-artista na

Hingpit na nga gisudlan sa sikat nga bokalista sa Rivermaya nga si Rico Blanco ang kalibutan sa arte pinaagi sa digital movie nga "Nasaan si Francis" independent movie nga co-produced nila ni Christopher de Leon ug Tony Gloria sa Unitel Productions.

Hagbay ra nga dunay mga offer si Rico aron mag-artista apan iyang gibasura apan ning higayona wala na siya makabalibad ni Epy Quizon nga suod niyang higala ug mao gyuy nihangyo niya.

Usa sa mga importante nga papel ang gidala ni Rico diin kauban niya isip mga bida sila si Epy ug Paolo Contis ug supporting role lang si Christopher nga nakapakugang sa bokalista.

Kini tungod kay wala siya magtuo nga mosugot ang beteranong aktor nga support role lang ingon man dili usab siya makatuo nga si Christopher na ang iyang ka-eksena sa launching movie niya.

Ang maong pelikula ubos sa direksyon ni Gabby Fernandez ug kinutlo gikan sa original nga Ilonggo story nga 'Diin na si Francis" nga nahimong finalist sa Cinemalaya.

Sa February 22 ipasalida ang nahisgutang lilas lukop nasud.

* * *

Samtang nitabok na sa Kapuso network si Jean Garcia diin duna siyay importante nga papel sa umaabot nga fantaserye ni Angel Locsin ug Dennis Trillo nga sugdan pagpasalida karong buwana.

Ang original unta nga titulo niini mao ang " Salamangka" apan giusab na kini ngadto na sa "Magica" diin apil usab sila si Carmina Villarroel, Zoren Legaspi, Bearwin Meily ug Polo Ravales.

Giingon nga balik GMA-7 ang drama ni Jean sanglit diha sa maong network man siya nagsugod isip artista isip usa sa mga sikat nga miyembro kaniadto sa That's Entertainment."

Wala pay gipirmahan nga kontrata si Jean ubos sa GMA-7 apan matud pa iapil na gilayon siya sa maong serye sanglit maayo man ang nahimong negosasyon tali niya ug sa management sa syete busa isunod nalang unya ang pinirmahay.

* * *

Nadawat na sa hingpit ni Ruffa Gutierrez Bektas ang step daughter sa iyang bana ug gani siya mismo maoy nangunay aron mahatagan og hugyaw nga birthday party ang bata.

Ang otso anyos nga bata nga ginganlan og Ilknaz anak ni Ylmaz Bektas sa laing babae bunga sa relasyon nga naumol sa dihang wala pa magtagbo ang ilang mga dalan ni Ruffa.

Suma pa nga gawas nga suod na kaayo ang bata ngadto ni Ruffa close na usab kini ngadto sa iyang mga anak nga sila Lorin ug Venice busa labihan ka malampuson sa birthday celebration ni Ilknaz didto mismo sa panimalay sa mga Bektas sa Istanbul, Turkey.

Matud ni Ruffa nga dili matukib ang kalipay nga iyang gibati nga sa hingpit nadawat na gyud niya ang bata nga maoy nagdala kaniya kaniadto og negatibo nga emosyon.