Julia, labing mahal nga bitoon

Usa ka dekada human nagsugod og gilak ang iyang bitoon sa kalangitan sa Hollywood kortesiya sa dili malimtan niyang lilas nga Pretty Woman, si Julia Roberts nagpabilin gihapon sa iyang trono isip labing mahal nga artista sa tibuok kalibutan.

Nailhan og maayo gumikan sa daw bombilya niyang pahiyom nga makahatag og kahayag ngadto ni bisan kinsa nga iyang mahimamat, si Roberts maoy bugtong artista nga makabungat og $20 milyones matag pelikula, matud pa sa labing uwahing taho sa British Broadcasting Network.

Nagsunod ni Roberts, nga maoy giyukbo-an nga "Queen of Hollywood" mao ang Latina nga si Cameron Diaz nga dili mominus sa $20 milyones ang bayad matag pelikula, samtang nahimutang sa ikatulo mao ang kanhi kapikas ni Tom Cruise nga si Nicole Kidman nga mangayo og $15 milyones nga paycheck matag salida.

Sila si Reese Witherspoon ug Drew Barrymore maoy nagkapyot sa ikaupat ug ikalimang puwesto gumikan kay makapangayo sab sila og $15 milyones matag salida. Nakabentaha kanila si Kidman sa lista gumikan kay nakadaog na man og Oscar award ang makabibihag nga Awstralyanang aktres.

Nagkumpleto sa listahan sa Top 10 sa mga highest-paid actress mao sila si Halle Berry ($14 million), Sandra Bullock ($13 million), Angelina Jolie ($11.6 million), Renee Zellweger ($11.6 million), ug Jennifer Lopez ($11.6 million).