Gipangandoy nga bidlisiw sa kalampusan

Duha ka tuig na ang nakalabay human daw natay-og ang kinatibuk-ang social hall sa Shangri-La Hotel sa isla sa Mactan gumikan sa kasipa sa pakpak nga mipatigbabaw sa palibot atol sa "oath taking reception" ni Presidente Gloria Macapagal-Arroyo niadtong Hunyo 30, 2004.

Ang hinungdan niini walay lain kondili ang malanoy nga musika nga naggikan sa kahanas na sa mga sakop sa Talisay City Children's Rondalla nga mga tinun-an sa Vicenta Manreal Elementary School nga maoy bugtong maglilingaw niadtong mga gutloa. Wala kapugngi sa mga halangdong bisita ang pagpahungaw sa ilang pagdayeg sa gipaambitan nga talento sa mga bata nga nagpangidaron og sais ngadto na sa dose anyos. Gani ang mga silbidora wala man usab makalikay nga nihunong sa makadiyot gikan sa ilang gimbuhaton aron paminawon sa taman ang maanindot nga sonata nga produkto sa mga nagkalainlaing string instruments.

Aha, kinsay magtoo nga ang mataghapon nga pag ensayo human sa klase, ginamit ang menos nga kalidad sa mga instrumento mao diay mahimong dalan aron sila makahimamat ug daygon pa sa Presidente sa nasud? Apan ang tanan bunga sa ilang sakripisyo kaniadto diin inay magduwa o musutoy pagpauli human sa klase gibubo nila ang ilang panahon sa pag-ensayo. Nan milipang ang maong pagsakripisyo sanglit nalakip man sila sa mga mananaog sa National Music Competition for Young Artists niadtong 2004 ug 2002.

Ang mga ginikanan, nga bisan sa kanihit ug kainit, migahin gayud panahon ug nagtigom gayod ug kantidad aron ikapalit sa gikinahanglan nga mga instrumento daw kabuthunon ang ilang dughan, sa pagkakita nila nga anaa na sa nasudnong telebisyon ang ilang mga anak sa dihang mipasundayag sila sa Children's Summit sa Manila bag-ohay lang.

Si Mrs. Lucia Deiparine, magtutudlo sa nahisgutang tunghaan ug usa ka "frustrated musician", maoy unang nakahuna-huna pag-umol sa maong grupo niadtong tuig 2000. Siya giabagan ni Miss Humildad Daclan, nga maoy matawag nga maayong 'lake" isip trainor tungod sa iyang kasinatian sa pagpadagan sa Rondalla of the Sisters of Mary. Matud ni Mam Deiparine, sukwahi sa ubang mga rondalla, nga igo na lang mipundok sa mga bata nga makamao na mogunit og instrumento nagsugod gyud sila sa wala diin bugtong nilang puhunan mao ra ang ilang gugma sa tunghaan ug musika.

Miingon si Deiparine nga giawhag lang niyang muapil ang mga bata ug ginikanan nga desidido tungod kay maikog siyang mo-demand sa palitonon nga string instruments. Kini tungod kay ang labing barato nga string instrument nga segunda mano mokabat ngadto sa P1,200. Apan wala kini igsapayan sa mga natungdan busa nakapalit dayon sila og 21 ka mga instrumento usa ka buwan human sa ilang pagplano-plano.

Bulan sa Agosto sa 2000, o duha ka buwan sila human hingpit nga naumol ang mga mauwawong mga miyembro sa Rondalla, mapahiyomon nang mipasundayag sa una nilang tukar nga nakat-unan nga "DOREMI" atol sa general assembly sa Parents and Teacher's Association sa ilang tunghaan. Una nilang exposure sa gawas mao ang pagtukar sa lungsod sa San Fernando diin atol sa tigom sa mga Boys Scout sa distrito. Ning panahona mapasigarbohon na silang mitukar sa duha ka tag-as nga kanta nga mao ang "Bahay Kubo" ug "Tinikling". Sukad niadto nagkadaghan na ang ilang mga imbitasyon hinungdan nga nakatigom tigom na sila nga maoy ilang gigamit alang sa ilang panginahanglanon ingon man pahalipay sa mga naglangkob sa grupo.

Pagligid sa mga adlaw niabot sa atensyon ni Kongresista Eduardo Gullas (nga niadtong tungora maoy Mayor sa dakbayan) ang ilang suliran busa wala magduha duha ang naulahi pagbubo sa iyang tabang ug suporta..

"Dili gyod ko kalimot ni Mayor Eddie nga kausa ra namo giadto sa iyang opisina ug nakaangkon dayon kami og mga Class A nga mga instrumento," matud ni Deiparine.

Sa pagkakaron duna nay mga bag-ong miyembro sanglit ang mga daan o unang sakop nanagko na ug tua na sa high school. Apan ang nakanindot kay ang mga daan nga sakop mao usay naningkamot pag-umol og grupo diha sa ilang tagsa tagsa ka tunghaan busa nagkadako ang pamilya.

Hinuon si Deiparine nagkanayon, nga sa pagkakaron, mura na og mihinay ang motivation sa ubang mga bata ug mga key personel tungod sa walay ayuda. "Mas maayo man god ang dagan sa grupo og naa gyuy way putol nga suporta aron ma-motivate ang mga bata sa pag-apil, lakip na ang mga ginikanan," matud ni Deiparine.

Miangkon siya nga gasto gayod ang padayon nga pag-ugmad sa maong grupo tungod kay mopahinungod ka og snacks og dili gani kada adlaw aduna gayuy mabugto nga kwerdas nga kinahanglan ilisan.

Pero nag-ampo ug naglaum si Deiparine, apil na ang mga mapahiyumon ug mga desidido nga mga bata nga ang tanang mga kalisdanan nga nasinati ug ang umaabot pa masulbad ra gayod. Giangkon sa maong grupo, nga wala pa nila hingpit natagamtam ang silaw nga maoy sumbanan sa kalampusan sa ilang bitoon. Dungan niini ilang gipasalig nga dili nila tugtan nga mapawong ang gamay nga kasanag nga ila karong naangkon sa ingon musulbong gyud sila ngadto sa labing taas nga ang-ang pag-abot sa tukmang panahon.