Jeffrey Hidalgo nakabangga og babaye

Daling gilimod sa kampo sa singer nga si Jeffrey Hidalgo ang taho nga naka-hit and run siya og duha ka babaye didto sa Marikina City ning bag-o lang.

Ang tsika sa source ni Salve Asis sa Pang Masa nga unang nagsugod sa blind item ang maong taho nga matud pa mga alas-kwatro kadto sa kaadlawon nga nahitabo diin inay nga tabangan ni Jeffrey ang maong mga babaye iya lang kini nga gibiyaan.

Apan matud pa daghan nang mga tawo niadtong mga orasa busa daghan ang nakakita sa insidente hinungdan nga gigukod si Jeffrey sa mga residente didto.

Walay nahimo ang singer sanglit naapsan siya sa mga naggukod niya hinungdan nga napugos kini pagkanaug sa iyang sakyanan apan ning mga higayona giingon nga naghinambog ang nahisgutan pinaagi sa pag-ingon nga "Si Jeffrey Hidalgo ako at singer ako."

Wala gilayon mapagya ang maong isyu sanglit gihangyo ni Jeffrey ang mga ginikanan sa mga biktima nga ihilom na lang ang nahitabo.