Album ni Pacquiao nahurot, Las Vegas nagkagubot

Daw gitilian sa bakunawa ang album ni Manny Pacquiao nga nagtangag sa kanta nga 'Para Sayo ang Laban na To," didto sa Las Vegas Nevada human sa iyang kadaugan niadtong Domingo.

Ang mga representante sa Star Records mibutyag nga gikagubtan og maayo ang album ni Pacquiao didto sa Las Vegas Nevada diin ang tanan buot makahupot og kopya niini.

Suma pa nga sa Vegas pa lang daan tres mil ka kopya ang diretso nga nahalin pipila ka gutlo human sa away nila ni Pacman ug Erik Morales busa gikinahanglan pa nga mag-order og usab sanglit daghan pa ang gusto nga mopalit.

Ang maong album gi-record ni Pacman dinhi sa Pilipinas niadtong buwan sa Oktobre ug Disyembre diin ang mga kanta ginama sa nabantog na kaayo nga composer ug higala sa boksidor nga si Lito Camo.

Si Annabel Regalado usa sa mga bossing sa Star Records namahayag nga malaumon sila nga mopirma si Pacman og lain nga kontrata alang sa second album sa boxing champ diin iyang gipasabot nga dunay templa nga Manny Valera ang tingog sa boksidor hinungdan nga haom kini isip recording star.

Samtang si Wilson Tieng tag-iya sa Solar Films namahayag nga ang DVD nga nagpakita sa tanan nga mga kadaugan ni Pacman paspas usab ang halin sa pagkakaron diin malaumon sila nga kagubtan usab kini sa international market.

Makita sa maong DVD ang pakig-away ni Pacman batok nila ni Mexican Marco Antonio Barrera, Thailand's Fahsan 3K Battery ingon man usab ang away nila ni Pacquiao ug Morales niadtong Marso 2005.