Anne ug Luis mag-uyab na

Gitin-aw ni Luis Manzano niadtong Domingo sa gabii ngadto sa usa ka showbiz insider sa kauluhan nga duna na silay espesyal nga pagtinagdanay ni Anne Curtis.

Kini human matino usab nga buwag na si Anne ug ang iyang uyab nga si Paolo Araneta apan wala pa maklaro kanus-a ug unsay hinungdan sa maong break-up.

Gipaabot hinoon nga sa pagbuto niining balitaa karong adlawa nga eksklusibong nakoykoyan sa atong kauban nga kolumnista sa The Freeman entertainment nga si Salve Asis mohatag na og katin-awan si Anne kalabot niini sanglit nauna na nga miangkon si Luis.

Kahinumduman nga gipangutana sa Banat Hugyaw kaniadto ang duruha atol sa presscon sa 'Kampanerang Kuba" dinhi sa Sugbu kon duna bay kahigayonan nga magkauyab sila sa tinood nga kinabuhi diin ilang gibarugan imposibli kini sanglit suod lang gyud sila nga managhigala.

Gitoohan nga namugna ang labaw pa sa panaghigalaay nga relasyon sa duruha tungod sa kanunay nilang panagkuyog kanunay sa taping sa "Kuba" diin sa pagtapos sa estorya si "Emang ug Pablo" gyud ang nagdayon.

Sa sayo pa namahayag na hinoon ang duruha nga dili imposible nga mahulog gyud ang ilang pagbati ngadto sa usag usa sanglit sinati na nila ang ilang masig ka kaugalingon ug duna na silay maayo nga "pinagsamahan" kaniadto pa.

Niadtong nakalabay nga tuig pa gihagawhaw nga nagbuwag na sila si Anne ug Paolo gumikan sa pag-selos sa naulahi apan hugtanon kini nga gihimakak sa dalaga atol sa iyang programa matag Domingo nga 'Wanna Buzz.'