Tessie mobiya sa QTV

Usa lang ka show sa QTV-11 ug dili napulo ang gikatakda nga matangtang sa second season suma pa sa usa ka GMA-7 insider nga mihagawhaw sa Banat Hugyaw kagahapon.

Ang maong show mao ang "Pusong Wagi" nga giduma sa beterana nga TV host nga si Tessie Tomas apan wala matino kon unsa ang tinood nga hinungdan nganong tangtangon kini.

Igo lang miingon ang source nga nakadesisyon ang management nga dili na nila i-renew ang kontrata alang na unta sa second season sa nahisgutan nga show.

Napagya kagahapon nga napulo ka mga shows lakip na ang "Pusong Wagi' ug ang soap ni Nadine Samonte nga giulohan og "My Guardian Abby" ang gikatakda nga wad-on na sa dili madugay.

Kini tungod kay matud pa hinay ang rating niini hinungdan nga wala usay mga advertisements nga musulod diin ang gitumbok nga hinungdan mao ra usab ang mga shows sa primetime block sa GMA-7.

Suma pa nga sanglit nakapanukad nang daan ang mga shows sa GMA-7 ang mga tumatan-aw nagsunod na niini busa wala na silay panahon nga mobalhin pa ngadto sa QTV11.

Apan suma sa tinubdan kagahapon nga maayo ang dagan sa rating sa 'My Guardian Abby" busa duna kini season two.

Si Tessie naila kaayo nga talent kaniadto sa Kapamilya network apan last year lang nakugang na lang ang mga himantayon sa dihang nakita na siya isip usa sa mga major casts sa padayon nga gikabuangan nga sitcom sa GMA-7 nga "Bahay Mo ba to" matag Miyerkules sa gabii.