Cassandra wala magbasul

Walay pagbasul si Cassandra Ponti bisan og nagpasexy siya kaniadto sa una niyang mga pelikula una siya nalakip sa bag-o pa lang nahuman nga Pinoy Big Brother show sa abs-cbn.

" I have no regrets kasi it's my choice. I have nothing to explain," matud pa ni Cass atol sa pagpakighinabi niini sa Cebu press uban ang dose ka housemates didto sa Casino Filipino sa Waterfront Hotel Lahug.

Wala mokomentaryo si Cass kon tinuod ba nga giparetoke niya ang iyang ilong apan iyang giangkon nga kanhi mamo-puay siya og prutas didto sa Tagum Davao sa wala pa siya nanimpad didto sa kauluhan.

"Ang among negosyo didto kay prutasan man unya gipadako man mi nga wala magsalig sa katiwala," pagtin-aw pa niya.

Samtang mikatawa si Cass human subling namahayag si Uma Khouny nga nahigugma siya sa naulahi dungan sa pag-ingon nga kon makabaton lang sila og higayon sigurado gyud nga dunay mahimugso nga relasyon tali nilang duha.

Apan giangkon sa duruha nga lisod kining mahitabo sanglit pareho sila nga busy sa ilang pag-artista busa priority una nila ang ilang trabaho og pasagdan nalang nga dunay mamugna nga relasyon sa pagligid sa mga adlaw.