Gabii sa kaanyag ug kaalam

Usa ka gabii. Dihay dose ka mga maanyag nga Sugbuanon. Sila nagbaton og kaalam ug igong pagsalig sa kaugalingon. Human sa kapin sa duha ka oras nga bangga ug pagpakitaay og maayong labok usa lang ang nagpabiling nagbarog ug nakaangkon sa korona isip Miss Cebu 2006.

Siya walay lain kondili ang disiotso anyos nga psychology student sa University of San Carlos nga si Stephanie Señeres kinsa kasamtangan nga myembro sa Models Association of Cebu.

Kahinumduman nga si Miss Cebu 2002 Melanie Ediza ug Miss Cebu 2003 Karla Bautista kinsa mipakita og maayong labok sa Binibining Pilipinas mga sakop usab sa MAC.

Ang 5'7 inches tall nga si Stephanie milangkat sa korona pinaagi sa iyang Hugyaw nga tubag sa final question kalabot sa kon kinsa ang duha ka mga malampuson nga personalidad ug laing duha ka mga badlongon ang gusto niyang ikadungan og panihapon.

Ang gipili ni Stephanie mao si African leader Nelson Mandela tungod sa inspirasyon nga nahatag sa naulahi ngadto sa mga tawo nga nagtamod niya samtang ang ikaduha mao si Pope Benedict XV1 tungod kay matud niya haom ang naulahi sanglit ang Sugbu pinuy-anan sa bagang duot sa mga katoliko nga labihan ang pagsalig ngadto sa Ginoo.

Ang mga badlongon alang kang Stephanie mao sila si Saddam Hussein ug US President George Bush diin iyang gipasabot nga gusto siya makigpanihapon sa duruha sanglit mahigugmaon siya sa kalinaw busa bout siya nga ilang estoryahan unsaon pagpatunhay sa kahapsay ug paghinigugmaay sa tibuok kalibutan.

Si Stephanie mao usay nakadaog isip Miss Photogenic ug Best in Gown nga gidesenyo ni Wendell Quisido samtang ang laing nagpakadaug mao sila si Angel Wella Luzano first runner-up, Karla Paula Ginteroy 2nd runner up, Elaine Lourdes Gica 3rd runner-up ug fourth runner-up si Jan Marie Aliño.

Si Karla kinsa maoy Miss Freeman Banat News ug Miss Tri medialympics karong tuiga mao usay napili isip Miss Waterfront Friendship samtang si Carmen Victoria Tiu maoy gipurong-purongan isip Miss Myra 300A.

Si Stephanie nga nahinabi makadiyot sa Banat Hugyaw human siya midaug namahayag nga wala siya magdahum nga siya maoy makadaug ug gani iya nang gikondisyon ang iyang kaugalingon nga dawaton ang bisan unsay mamahimong resulta.

Nasayran nga si Stephanie unang niapil og beauty pageant sa pangidaron nga disisais diin siya maoy nakadaug isip Miss Mandaue 2003. Miss Cebu mao ang ikaduhang indigay nga iyang giapilan.

Ang Miss Cebu 2006 beauty and brains pageant misamot ka mabulokon gumikan sa presensya nila ni Bautista, Ediza ug magsuong TJ ug Borgy Manotoc kinsa maoy mga hosts. Nipaambit usab sa ilang nindot nga tingog ang garbo sa Sugbu nga sila si Maria Donna, Luke Mejares ug world champion Rizza Navales.