Juday ug Ryan dunay salida

Subli na usab nga makita sa telebisyon ang managhigugmaay nga si Judy Ann Santos ug Ryan Agoncillo sa dili madugay pinaagi sa mga estorya sa komiks ni Pablo S. Gomez.

Ang mga estorya sa maong komiks himoon nga salida sa telebisyon nga maoy gikatakda nga ihulip sa hapit na usab mahuman nga 'Mga Anghel na Walang Langit" sa abs-cbn.

Sigun sa taho nga nagsugod na ang shooting sa pilot episode nga giuluhan og "Inday Bote" diin ang bida mao sila si Juday ug Ryan samtang makauban usab nila ang pito sa trese ka mga housemates.

Wala pa hinoon ibutyag kinsa sa mga housemates ang nalakip alang sa maong salida diin matapos ra usab kini sulod lang sa usa ka semana.

Kahinumduman nga unang nag-uban sa salida sa telebisyon sila si Juday ug Ryan pinaagi sa pantaserye nga "Krystala" diin didto namugna ang espesyal nila nga pagtinagdanay.

Gawas niini gikatahong duna usay giandam nga pelikula ang Star Cinema nilang duha samtang sila usab ang gikatakda nga mohulip nila ni Jean Garcia ug Eula Valdez isip hosts sa cooking show nga "Makuha ka sa Tikim."