Izza Calzado magminyo na

Duna nay plano nga makigminyo sa iyang uyab ang sikat nga actress/model nga si Izza Calzado sunod tuig sigun pa sa pamahayag sa iyang amahan nga si direktor Lito Calzado.

Matud sa direktor mao ni plano sa iyang unica jija sanglit sunod tuig 25-anyos na si Izza samtang ang iyang uyab nga si Jerry Garcia kinsa nagbase sa Estados Unidos magpanuigon na og 34 nianang panahona.

Napanlantawan ni direk Lito nga hayag ang ugma ni Izza sa mga bukton ni Jerry sanglit gawas nga nagkahinigugmaay ang duruha maayo og pangita ang nauwahi isip financial consultant sa usa ka dako nga kompaniya didto sa Amerika ug talent manager usab sa usa ka Fil-am band didto.

Konserbatibo apan maayong pamilya ang kagikan ni Jerry diin ang amahan niini usa ka inilang heart surgeon kinsa tag-iya og usa ka medical center.

Samtang nakabalik na sa nasud niadtong Martes sa gabii si Izza Calzado gikan sa iyang pagbakasyon didto sa Amerika diin nagkuyog sila si Jerry panahon sa Pasko ug Bag-ong tuig.

Gani nibalik na siya sa taping sa "Etheria" sa GMA-7 ug sa "At Your Service" sa QTV 11.