Kristine Hermosa absent

Gi-snob ni Kristine Hermosa ang presscon alang sa iyang umaabot nga soap-"Gulong ng Palad"- sa ABS-CBN apan ang mga dumadapig sa aktres namahayag nga nasakit ang nahisgutan.

Wala ibutyag unsa nga matang sa sakit ang gihambin sa aktres niadtong Martes nga maoy schedule sa presscon busa ang mga himantayon nagduda nga drama lang ang tanan.

Apan matud pa nila nga kon ugaling tinuod nga nasakit gyud si Kristine last Tuesday puwes alarming na ang iyang kahimtang tungod kay sa dihang nagsige pa ang shooting sa maong soap gikataho usab nga nalangan kini gumikan kay nagkasakit sakit usab ang aktres.

Nagbinugtong si TJ Trinidad pag-promote sa iyang soap dungan sa pagpangaliyupo nga suportahan siya sanglit mao ni ang una niya nga starring role.

Maayo na lang usab kay miabot ang pipila sa supporting casts sama nila ni Cherie Gil, Andrea del Rosario, Raquel Villavicencio ug ang loveteam ni Joross Gamboa ug Roxanne Guinoo.

Gumikan niini mas gigaling og maayo sa press people si Joross ug Roxanne og karon pa lang gi-intriga na nila daan nga mas mo-click pa ang duruha kon itandi sa experimental loveteam nila ni Kristine ug TJ.