Bb. Pilipinas Carlene Aguilar paborito sa crowd

Ang pagkadaog ba kaha kuno ni 2005 Miss International Lara Quigaman ang sinugdanan sa winning streak sa Pilipinas sa global beauty pageants?

Kinahanglan nga atong atangan karong moabot Disyembre 10 niining tuiga diin si Bb. Pilipinas Carlene Aguilar makigkompetensiya sa Miss World 2005 title nga ipahigayon ngadto sa usa ka maanindot nga resort sa lungsod sa Sanya, Hainan Island sa China.

Mga 115 ka kandidata gikan sa nagkalain-laing nasud ang miapil sa maong indigay.

Ang Times Magazine duna na kunoy mga nindot nga feedbacks nga ilang nadawat gikan sa insider sa Miss World nga si Aguilar consistent kuno nga paborito sa crowd sa nagpadayong mga activity sa maong pageant didto sa Sanya.

Apan hinoon dili kuno kasiguroan ang pagkapaborito sa crowd nga mao nay posibleng makadaog sa korona.

Sugod karong adlawa Nobiyembre 21, i-air sa Star World cable channel ang Miss World Vote For Me shows diin kada Lunes sa 9:30 sa gabii ug Huwebes sa 9:00 sa gabii na kining ipasundayag ug ang tanang televiewers imbitado sa pagbotar sa ilang paboritong kandidata.