Si Dulce ang nakakaplag

Atol sa among reunion uban sa mga higala nila ni Dulce ug Primo Sanchez Isok, may gipaila si Dulce namo nga iyang gipakuyog sa among ikatulong adlaw nga kalihokan diin, nanginhas mi (namunit og mga kinhason sila si Bernard, Dana, Jmayma ug David Izra) didto sa kabaybayonan sa Compostela pinaagi sa mga maayong kabubut-on sa kapamilya nila ni Primo ug Cora.

Sa akong pagpakighinabi sa gipaila ni Dulce kanako nga si Bryan Cabase, nasayran nako nga kapamilya gyod diay siya sa banay nga Cabase, kay anak siya, sa anak ni anhing Siux Cabase, kadtong Edmund Cabase nga sakop sa Firelights Band. Sa ato pa, apo na siya ni Edmund. Gikaila kuno niya si Dulce pinaagi sa 700 Club. Nakatan-aw siya kausa, ug niadtong tungora, hasol kaayo ang iyang hunahuna, ug diha pay higayon nga nakahunahuna pa siya'g patay sa iyang amahan ug sa iyang kaugalingon.

Kini ang hinungdan nganong nasakop na siya sa church ni Dulce, kay diha niya makita ang kalinaw busa, ang iyang mga awit karon, kadaghanan, mga inspirational songs nga gihalad niya kang Jesus Christ nga nakapausab sa iyang paglantaw sa kinabuhi.