Franzen nagpasikat lang

Nagtuo ang ex-housemate nga si Bob nga ang iyang amigo nga si Franzen nagpasikat lang aron makakuha og atensyon sa publiko hinungdan nga nagsigi kini og pabadlong sulod sa balay ni Kuya.

Kini ang pamahayag ni Bob atol sa pakighimamat nila sa Cebu media didto sa Casino Filipino sa Waterfront Lahug kagahapon sa udto diin gikagubton sila og maayo.

Gitataw ni Bob nga posibling paagi ra kining tanan ni Franzen sanglit ang Pinoy Big Brother being a reality based show usa ka kompetisyon nga nagtangag og ganti busa gikinahanglan nga mohimo og gimik aron mapansin.

Kahinumduman nga gipalayas gikan sa balay ni Kuya si Franzen kagabii gumikan kay naupos na ang pasenya ni Kuya tungod sa walay hunong nga pagpabadlong sa nahisgutang ex-housemate.

Gikagubtan og maayo labi na sa kababayen-an ang pito ka mga ex-housemates nga sila si Chyx, Racquel, Jenny, Jason, Rico, Bob ug Sam diin walay puas ang picturetaking ug autograph signing human sa presscon.

Nitambong usab ang kapitbahay ni Kuya nga si Mariel Rodriguez kinsa gitabangan og sungog kon unsa niya ka mahal si Sam tungod kay una na nga napagya nga na-crush siya sa nahisgutan nga evictee.

As usual showbiz ang tinubagan ni Mariel by saying "of course silang lahat ang mahal ko,' apan una niini si Sam nga gikuhaan og pamahayag niangkon nga wala siya masayod nga na crush niya ang fast rising tv host.

Ang pito ka mga former housemates dinhi na sa Sugbu sukad pa niadtong Biyernes aron i-promote ang Pinoy Big Brother ug agi usab og pasalamat sa mainiton nga suporta nga gipadangat sa mga Sugbuanon sa nahisgutang show.

Niadtong Biyernes sa gabii didto ang mga former housemates sa Ayala Entertainment Center alang sa taping sa "Jud Morning" nga makita karong alas dyes y medya sa buntag sa ABS-CBN- Cebu.

Ang talent coordinator sa "Jud Morning" nga si Marcelyn Cabildo nitug-an sa Banat Entertainment nga diriyot wala madayon ang taping didto sa Ayala sanglit labihan na kasaba sa palibot tungod sa mga shagit ug pakpak sa mga tawo nga naghugop didto sa venue.