Itchyworms band dunay 'noontime show'

Dili ninyo makita kon dili igo lang ninyong madungog tungod kay ang "noontime" show dili salida kondili titulo sa labing bag-o nga album sa banda nga Itchyworms.

Ang nahisgutang grupo dili usab katol ug labaw nang wala na kinahanglana nga kiskisan pa ninyo ang putos sa maong album kondili igo lang kamong maminaw sa mga kantang makalingaw ug makapagilok dili sa inyong kaunoran kondili sa inyong mga tiil aron kamo makasayaw ug makakinding kinding.

Gigaling ubos sa Universal Records, ang "noontime show" nagtuki sa mga panghitabo samtang magpadayon pagdagan ang camera aron mahulagway sa hingpit ang dagan sa mga salida sa telebisyon sa oras ting-paniudto.

Napanglantawan nga ang mga kantang "Theme Song", Contestant No. 1", "Salapi", "Love Team" ug "Production Number" maoy mosulbong pag-ayo aron pagdalit kaninyo og haom ug dili basta basta nga kalingawan.

Kiay-kiay usab pinaagi sa kantang "Akin Ka Na Lang" nga maoy carrier single sa "noontime show album" samtang gilakip usab ang kanhi hit song sa Itchyworms nga giulohan og "Buwan."

Samtang dili usab angayang pakyason pagpaminaw ang lain pang mga kanta sama sa "Falling Star" ug "Soap O Pera" diin hasta mga television producers ug performers malingaw ra gihapon bisan pa og sila maoy gipasabot sa nahisgutang mga sonata.

Ang Itchyworms gilangkuban nilang Jazz Nicolas (drums/vocals), Kelvin Yu (bass/vocals), Jugs Jugueta(guitar/vocals ug Chino Singson (guitar/vocals).

Ang nahisgutang banda nagsugod nine years ago ug nakadaog na og awards isip top winner sa 1996 NU 107 BandMania, 3rd placer sa 1997 MTV Band alert ug Best New Artist awardee sa NU Rock Awards in 2001.

Lakip sa mga kanta nga ilang napasikat mao ang "Bituin" alang sa pelikulang Dos Ekis sa Viva Films, "Minutes" ug "Chocophotoland" alang sa Gamitan sa Viva lang gihapon ug "Salapi" alang sa independent movie entitled Big Time.