Kinsa ang labing guwapa sa showbiz?

Lima lang ka mga babaye ang gipili sa sikat nga beauty expert nga si Ricky Reyes nga matod pa niya maoy labing guwapa nga mga binuhat sa showbiz circle.

Nag-una sa listahan si Lorna Tolentino nga matud pa niya guwapa bisan duna o walay make-up, sunod ang batikan nga script writer nga si Donna Villa sanglit matud pa niya dunay misteryo nga nagpahipi sa matag sidlak sa mga mata niini.

Laing guwapa alang kaniya mao si Dawn Zulueta sanglit ang kaanyag niini wala na magkinahanglan og make-up, si Lucy Torres Gomez ug Ruffa Gutierrez usab tungod kay ang ilang mga nawong nagbaton og katahom nga mulungtad hangtud sa hangtud.

Sa dihang gipangutana kon kinsa sa mga young stars karon ang labing guwapa alang niya, walay lipod-lipod nga namahayag si mother Ricky nga nag-una sa iyang listahan ang Darna nga si Angel Locsin.

Matud pa niya nga nakulit sa nawong ni Angel ang tukmang kainosente nga giliman og labihan ka sanag nga sex appeal, nisunod sa listihan si Iya Villania, Katrina Halili, Kristine Hermosa ug Paulene Luna.

Bisan og dili na teenager, gilakip usab ni Ricky isip guwapa alang niya ang engkantada nga si Izza Calzado and of course wala niya kalimti si Gloria Romero isip labing maanyag nga lola.

Samtang sugdan na karong Biyernes November 11 sa alas dyes ngadto sa alas-onse sa buntag pagpasalida pinaagi sa QTV-11 ang "Gandang Ricky Reyes" nga nibalhin gikan sa RPN-9.

Susama na siya sa usa ka talk-show diin mas bongga ang mga segments ug makahimo pag-interact live ang audience.