Melanie Marquez Kapuso gihapon

Giklaro sa kanhi Miss International nga si Melanie Marquez nga usa gihapon siya ka certified Kapuso ug dili tinood nga nagpadayag siya nga mobalhin sa abs-cbn.

Gitataw usab niya nga wala siya kahiubos sa Kapuso human siya gitangtang isip co-host ni Ricky Lo sa showbiz oriented show nga "Showbiz Stripped".

Matud ni Melanie nag-reformat ang nahisgutang show diin gihimo na kini nga documentary og angayan lang nga si Ricky ang mahabilin gumikan kay haom ang naulahi sanglit beterano naman kini sa industriya.

Suma pa niya nga dako na kaayo niyang dungog nga nalakip sa maong top rating show ug dili tinood nga nagpadayag siyag kagustohan nga motapon ngadto sa Kapamilya network tungod sa iyang pagkatangtang.

Gipasabot ni Melanie nga dili gyud siya makamahay sa GMA-7 tungod kay pinangga siya kaayo sanglit gihatagan man siya og iyang kaugalingong show.

Si Melanie maoy mo-host sa Ginang Fashionista nga adto ipakita sa QTV 11 nga giduma na karon sa GMA-7 ug gitakda nga magsugod og operate sunod buwan.

Gidugang ni Melanie nga ang iyang pag-guest sa Home Boy ni Kuya Boy kansang episode ipasundayag pa lang wala magpasabot nga motapon na siya sa abs-cbn.

Suma pa niya close friend niya ang sikat ug respetado nga television host busa dili gyud kini niya mabalibaran gawas nga dako siya og utang buot kang Boy tungod sa mga tabang nga gihatag sa nahisgutan ngadto kaniya.