Dennis Trillo, nadawat na ang kaparutan?

Swerte si Dennis Trillo kon showbiz career ang hisgutan gumikan kay left and right ang offers nga iyang madawat matag karon ug unya diin siya maoy mamili hain niining tanan ang iyang sugtan ug buhaton.

In demand usab siya sa mga corporate shows samtang wala na siyay's angay nga pangayoon tungod kay sa nakalabay nga tuig nangharos siya sa mga film festivals diin nakaangkon siya og best supporting actor og best actor trophies pinaagi sa pelikulang "Aishte Masu 1941".

Apan namatikdan nga medyo pakyas si Dennis sa love department tungod kay wala gyud niya maangkon ang tam-is nga paghigugma ni Angel Locsin.

Ang pagbati ni Dennis nadiskubrehan nga nagsugod sa dihang gihimo pa nila ang "Mulawin" ang labing una nga pantaserye sa GMA-7 diin bida usab si Richard Gutierrez.

Tungod sa presensya ni Richard wala makabuylo sa iyang pagpangulitawo si Dennis ngadto kang Angel gumikan kay ang gipalambo sa GMA Artist Center mao man ang love tandem ni Richard ug Angel.

Sa dihang nagsugod na ang "Darna" diin sila nalang ni Angel ug Dennis ang nagkuyog giangkon sa naulahi atol sa presscon dinhi sa Sugbu niadtong Pebrero nga iyang ipadayon ang iyang nasugdan aron maangkon ang pagbati sa dalaga.

Apan sa ikaduhang higayon, nabaraw na usab si Dennis tungod kay nisulod sa eksena si Oyo Boy Sotto diin wala na gyud kapugngi ni Angel ang pag-angkon nga duna silay espesyal nga relasyon sa anak ni Dina Bonnivie.

Busa ning ulahi sa higayon nga mahisgutan si Angel, daw nadawat na gyud kuno ni Dennis nga wala na siyay paglaum sa dalaga tungod kay modiretso kini og ingon nga iya nalang pasagdan ang dalaga nga adto magpa-uraray sa mga bukton ni Oyo Boy.