Izza Calzado makigtagbo sa iyang BF sa US

Nananghid na ang actress nga si Izza Calzado sa iyang amahan nga makigkita siya sa iyang boyfriend didto sa Estados Unidos karong semanaha.

Ang aktres nga mas misikat karon og maayo isip Amihan sa top rating pantaserye sa GMA-7 ang "Encantadia" gikatakdang mulupad paingon sa Los Angeles California karong Sabado alang sa usa ka horror film festival.

Nominated si Izza alang Best Supporting Actress category sa nahisgutang festival alang sa pelikulang Sigaw nga gi-produced sa Regal Films alang sa nakalabay nga Metro Manila Film Festival niadtong Disyembre.

Tungod sa pagpananghid ni Izza wala malikayi nga gisungog ang iyang amahan-direktor Lito Calzado nga basin og magpakasal na ang iyang unica hija didto sa U.S.

Apan mikatawa lang ang direktor ug masaligon nga layo ra kini sa tinood gumikan kay nakaila siya sa iyang anak ug nasayod siya nga dili kini buhaton ni Izza.

Gipalanog niya nga kon desidido gyud ang iyang dalaga nga magpahigot na sa kaminyoon angayan nga mananghid kini og tarong inay idali dali ang maong butang.

Samtang padayon pa karong giasikaso sa Sugbuanong si Annabel Rama ang schedule sa iyang guapo nga anak nga si Richard Gutierrez sa ingon makaapil usab ang naulahi sa nahisgutang festival.

Si Richard maoy bida sa "Sigaw" diin kauban usab niya ang kanhi loveteam nga si Angel Locsin busa nagkanayon si Annabel nga angayan lang nga tua si Richard sa Los Angeles atol sa maong kalihukan.

Kon mahinayon si Richard wala siya sa Pilipinas sugod sa Oktobre 22 hangtod sa 24 og gikinahanglan gilayon siyang mobalik alang sa shooting sa "Sugo" ug "Mulawin" the movie.